Боксчиларимиз WBC Гран-присининг илк босқичидан қанча пул ишлаб олишди?

Турнирда беш нафар ўзбекистонлик чарм-қўлқоп усталари иштирок этишди.

— ярим енгил вазн тоифасида Аюбхон Бахтиёров франциялик Жамал Хажабни олтинчи раундда техник нокаут билан мағлуб этди;

— супер енгил вазндаги баҳсларда эса Мужибилло Турсунов ЖАР вакили Майкл Адесодунни очколар ҳисобига кўра таслим этган бўлса, Камронбек Эшматов украиналик Данило Лозанга имкониятни бой берди;

— Сухроб Қаюмов эса ўрта вазн тоифасида ташкил этилган беллашувда Франция вакили Эпрем Барикога очколар ҳисобига кўра мағлуб бўлди;

— оғир вазн дивизионида Лазизбек Мулложонов панамалик Марвин Мендосани муддатидан олдин таслим этди.

Шундай қилиб, ўз жангларида ғалаба қозонган боксчиларимиз 15 минг АҚШ доллари, мағлубиятга учраган вакилларимиз эса 7 минг АҚШ доллари мукофот пулига эга чиқди.

Энди Аюбхон Бахтиёров, Мужибилло Турсунов ва Лазизбек Мулложонов июнь ойида нимчорак финал жангларини ўтказади.