Бўлажак чемпионлар тарбияланаётган маскан - Пискент

Спортнинг футбол, қўл тўпи, юнон-рум кураши, эркин кураш, волейбол, бокс, стол тенниси, белбоғли кураш, шахмат, таэквондо (ITF) турлари мавжуд бўлган ушбу БЎСМда ҳозирда 880 нафар ўғил-қизлар машғулотларга зўр беришган. Туман марказида жойлашаган БЎСМнинг спорт мажмуасида етарлича шарт-шароитлар муҳайё қилинган. Шинам ва кўркам спорт мажмуада бир пайтнинг ўзида бир нечта спорт турлари билан шуғулланиш имконияти яратилган. Белбоғли кураш, таэквондо, эркин кураш, қўл тўпи каби спорт турлари билан ошно бўлган ўқувчилар  мамлакат миқёсида ўтадиган мусобақаларда етакчилар қаторида бўлаётгани мураббийларнинг жонкуярлигида, ўз устида ишлаши, изланишларида, дейиш мумкин.

БЎСМ директори Мухторхўжа Ғуломовнинг таъкидлашича, жамоавий спорт турларига ҳам алоҳида эътибор қаратилмоқда. Қўл тўпи билан шуғулланаётган ўқувчилар ўтган йили олий лига баҳсларида иштирок этиб, тўртинчи ўринни банд этгани мутахассисларинг қизиқишига, эътирофига сазовор бўлган. Жорий йилда эса, қўл тўпи жамоаси янада юқори натижаларни кўзлаган ҳолда машғулотларга астойдил киришган.

Пискент туман жисмоний табия ва спорт бўлими бошлиғи М.Ахроровнинг бизга берган маълумотларига кўра эса, спорт мактабида, мактабгача таълим муассасаларида, умумий ўрта таълим мактабларида, коллежларда эрталабки бадантарбия машқларининг бажарилиши мунтазам йўлга қўйилган. Демакки, эрталабки бадантарбияни, гимнастикани одат тусига айлантираётган экан, унинг инсон саломатлигига нақадар ижобий таъсир кўрсатишини тонгда туриб югураётган ёки эгилиб машқ бажараётган, юз-кўзида нурофшонлик кўринаётган одамдан сўранг.

Илҳом РАҲМОНОВ