Болалар спорти. Спортга ошно болалар

Бундай юксак эътибордан унумли фойдаланган спортчи-ўқувчилар бор маҳоратларини ишга солиб, мақсадлари сари дадил қадам ташлашмоқда. Тошкент вилояти жисмоний тарбия ва спорт бошқармаси тасарруфидаги Бўка туман болалар ва ўсмирлар спорт мактабида ҳам спорт машғулотларига қатнаётган болаларнинг юз-кўзларида яратилган  имкониятлардан, бугунидан шодумонликни англаб олиш қийин эмас. 

Мазкур БЎСМда айни пайтда 1360 нафар ўғил-қиз спортнинг футбол, волейбол, баскетбол, эркин кураш, кураш, белбоғли кураш, сузиш, бокс, оғир атлетика, шахмат, стол тенниси, ўзбек жанг санъати, каратэ, енгил атлетика турлари бўйича 38 нафар малакали мураббийлар қўл остида мунтазам машғулотларга киришган.  

Спортга ошно бўлган БЎСМ тарбияланувчилари орасида ўтказилаётган турли мусобақаларда ғолиб ва совриндор бўлиб, эътирофга сазовор бўлаётганлари талайгина. Хусусан, мураббий Шахзод Ҳазратов ва Сиржоддин Исроиловлар қўл остида белбоғли кураш билан шуғулланаётган ёш полвонлар республика миқёсидаги беллашувларда совринли ўринлар билан қайтишмоқда. 

Бобур Шуҳратов, Ҳабибулло Муҳаммадалиев, Сарвар Мамашокиров, Шерали Ғуломжонов, Аслиддин Абдирашидов, Зуҳра Қосимова, Дилафрўз Эгамбердиева, Юлдуз Омонова, Гуласал Иброҳимова, Мухлиса Эгамбердиева, Севинч Иброҳимова сингари кўплаб белбоғли курашчилар бугун БЎСМнинг фахрига айланишган. 

Ўзбек жанг санъати турида ҳам шундай юқори натижаларга гувоҳ бўлиш мумкин. Дилноза Турдалиева, Ҳусниддин Қаюмов, Сабоҳат Равшанова, Шаҳноза Тўрақулова, Камрон Абдужабборов каби ўн нафардан ортиқ ўзбек жанг санъати усталари ҳам белбоғли курашчилар сингари мамлакат чемпионатларида олтин ва кумуш медалларига эга чиқишмоқда. Каратэ, футбол, эркин кураш ва бошқа спорт турларида ҳам худди шундай вилоят ва республика миқёсидаги мусобақаларда кучли учликдан жой олишмоқда.

- Жисмоний тарбия ва спортнинг аҳоли орасида, жумладан ёшлар орасида оммавийлигини таъминлаш бош вазифаларимиздан саналади, - дейди Бука туман БЎСМ директори Фарҳод  Раҳмонов. - Яратилган бундай кенг имкониятлардан оқилона фойдаланиб, мавжуд спорт турларидан истеъдодли болалар қобилиятини шакллантириб, катта спорт сари йўналтириш, терма жамоалар таркибига муносиб номзодлар тайёрлаш қолаверса, жорий йилда совринли натижаларимизни янада кўпайтиришни  мақсад қилганмиз. 

Илҳом РАҲМОНОВ тайёрлади