Болтабой полвон “Ҳосил байрами”да ҳам тенгсиз + ФОТО

Cайл тарзида ташкил этилган байрам қишлоқ хўжалиги маҳсулотлари кўргазмалари, маданий дастурлар, халқ ўйинлари ва спорт мусобақаларидан иборат бўлди. Миллий спорт турларимиз - кураш, армрестлинг, тош кўтариш ва арқон тортиш мусобақалари ҳам тантана иштирокчиларига майрамона кайфият улашди.

Кураш мусобақаси мутлоқ вазн тоифасида уюштирилди. Унда 20 нафарга яқин хоразмлик эл таниган полвонлар бел олишди. Кейинги пайтларда юксак натижалари билан эътиборга тушаётган боғотлик Болтабой полвон Болтаев муваффақият қозониб, бош соврин - тулпор билан тақдирланди. Иккинчи ўрин шовотлик Нуртой полвон Искандаровга насиб этди. Фахрли учинчи ўриндан Умарбек полвон Рўзмаматов (Хонқа тумани) ва Алишер полвон Қурёзов (Ҳазорасп тумани) жой олди. Совриндор бўлган полвонлар ҳам телевизор ва қўйга сазовор бўлишди. 

Арқон тортиш беллашувида Шовот тумани жамоасига тенг келадиган топилмади. Армрестлинг баҳсида Хива шаҳри спортчиси Диёрбек Отажонов зафар қучди. Тош кўтариш машқини бажаришда ҳам хивалик Дилшодбек Бобожонов ғолибликни қўлга киритди. Мазкур мусобақаларнинг ғолиб ва совриндорларига ҳам ташкилотчилар томонидан қиммматбаҳо совғалар топширилди. Тадбир хоразмлик санъат усталарининг кенг қамровли концерт дастури билан давом этди.

Икром ХУДОЙБЕРГАНОВ, Урганч шаҳридан