“Бош вазир кубоги-2020” футбол мусобақасининг ташкилий қўмитаси йиғилиши ўтказилди

2019 йил 4 сентябрда Ўзбекистон Республикаси Президенти Шавкат Мирзиёев раислигида жисмоний тарбия ва спортни ривожлантириш, халқаро мусобақаларга тайёргарликни кучайтириш масалаларига бағишлаб ўтказилган видеоселектор йиғилишида вазирликлар, идоралар ва хўжалик бирлашмалари ҳамда ҳудудлардаги йирик корхона ва ташкилотларнинг марказий аппарати ходимлари ўртасида турли оммавий маданий ва спорт тадбирлари, жумладан “Бош вазир кубоги” мусобақаларини ўтказиш вазифаси юклатилган эди.

Ушбу топшириқ ижросини таъминлаш мақсадида Жисмоний тарбия ва спорт вазирлиги ташаббуси билан жорий йил 4-12 октябрь кунлари вазирликлар, идоралар, хўжалик бирлашмалари, йирик корхона ва ташкилотларнинг марказий аппарати ходимлари ўртасида футбол мусобақалари ташкил этилиши режалаштирилган.

Шу мақсадда бугун Жисмоний тарбия ва спорт вазирлигида “Бош вазир кубоги-2020” футбол мусобақасининг ташкилий қўмитаси йиғилиши ўтказилди. Унда ташкилотчилар билан бир қаторда ҳамкор ташкилотлар, жумладан, Ўзбекистон Миллий Олимпия қўмитаси, Ўзбекистон футбол ассоциацияси, қатор вазирлик ва идоралардан вакиллар ҳамда оммавий ахборот воситалари ходимлари иштирок этди. Йиғилишда бу йилги мусобақаларни ўтказиш тартиби, ҳал қилиниши лозим бўлган кўплаб масалалар муҳокама қилинди.

Жорий йилги мусобақалар пандемия шароитида, карантин қоидаларига қатъий амал қилинган ҳолда ўтказилади. Яъни, ўйинларни томоша қилиш учун мухлислар киритилмайди, агарки у майдонда куч синашаётган ташкилот ходими бўлса-да.

Футбол мусобақалари бўладиган майдонларга ҳар бир ташкилотдан фақат рўйхатдан ўтган 15 нафар ўйинчи, тренер ҳамда жамоа раҳбари, яъни 17 киши киритилади. Мусобақа иштирокчиларнинг ҳар бирига махсус рухсатнома, яъни бейжиклар тарқатилади ва бейжиги йўқ ҳар қандай ходимга ўйин бўладиган майдонларга киришга рухсат берилмайди.

Шунингдек, ташкилий қўмита томонидан иштирокчиларининг хавфсизлигини таъминлаш, ўйинлар бўладиган майдонларни дизенфикция қилиш, мусобақа ўтказиладиган майдонларга кираверишни антицептик воситалар билан таъминлаш ва бошқа масалалар ҳам эътибордан четда қолмайди.

-  “Бош вазир кубоги-2020” мусобақасини ўтказишдан кўзланган мақсад, аввало раҳбар ходимлар орасида соғлом турмуш тарзини кенг тарғиб қилишдан иборат. Агар раҳбар спортга қизиқса, билингки ўша корхона ва ташкилотда соғлом турмуш тарзига эътибор юқори бўлади. Ходим соғлом бўлса, иш унуми юқори бўлади ва бунинг натижасида самарадорлик ўз-ўзидан ортади. Кўряпсизми, раҳбар ходимнинг спортга қизиқиши жамият учун қай даражада фойда келтиради, - деб таъкидлади йиғилишда сўзга чиққан Жисмоний тарбия ва спорт вазирлиги бошқарма бошлиғи Умед Раджабов.

Хулоса қилиб айтганда, ташкилотчилар томонидан жорий йилги мусобақаларни ҳар жиҳатдан адолатли ва шаффоф ўтишини таъминлашга жиддий эътибор қаратилмоқда. Биз эса барча жамоаларга бўлажак мусобақаларда омад тилаб қоламиз.