«Бош вазир кубоги»: волейбол мусобақаларига ҳам старт берилди

Бугун Ўзбекистон давлат жаҳон тиллари университетида аёллар ўртасидаги волейбол мусобақаларига старт берилди.

Дастлаб мусобақанинг очилиш маросими бўлиб ўтди. Унда сўзга чиққан жисмоний тарбия ва спорт вазирининг ўринбосари Ш.Мўминжонов мусобақада иштирок этаётган барча жамоаларга омад тилади.

Таъкидлаш керак, волейбол мусобақаларида атиги 11та жамоа ғолиблик учун баҳс олиб боришмоқда. Бу ушбу мусобақага қизиқиш асло паст эканлигини англатмайди, аксинча вазирликлар, идоралар ва ташкилотларнинг марказий аппарати ходимлари орасида хотин-қизлар улушининг камлигини англатади. Бироқ, бу ҳол мусобақаларнинг қизиқарли ўтишига асло таъсир қилмайди, деган умиддамиз.

Бугун бошланган мусобақаларда Ўзбекистон Миллий ахборот агентлиги жамоаси илк учрашувда “Ўзкимёсаноат” АЖ жамоасини 2-0 ҳисобида мағлубиятга учратишган бўлса, худди шу ҳисоб Қишлоқ хўжалиги ҳамда Инновацион ривожланиш вазирлиги жамоалари учрашувида ҳам қайд этилди. Бу баҳсда омад қишлоқ хўжалиги вазирлиги аёл ходималарига кулиб боқди. Яна бир учрашувда Иссиқлик электр станциялари жамоаси “Шарқ” нашриёт-матбаа акционерлик компанияси қизларини 2-1 ҳисобида доғда қолдирди.

Волейбол мусобақаларида ғолиб ва совриндорлар 26 апрель куни аниқланади.

Жисмоний тарбия ва спорт вазирлиги Матбуот хизмати