"Бойсун баҳори" фестивали доирасида кураш ва югуриш мусобақалари ўтказилди ФОТОРЕПОРТАЖ

Ўзбекистон Республикаси Вазирлар Маҳкамасининг 2022 йил 7 февралдаги “Бойсун баҳори” халқаро фольклор фестивалини ташкил этиш ва ўтказиш чора-тадбирлари тўғрисида”ги қарорига мувофиқ ўтказилган фестивалда дунёнинг 30 дан ортиқ давлатидан мартабали меҳмонлар, соҳа мутахассислари, саньаткорлар ва мухлислар иштирок этди.

Паданг кенгликларида юздан ортиқ ўтов уйлар ўрнатилиб, миллий қадриятларимизга мос безатилгани, Қорақалпоғистон Республикаси, Тошкент шаҳри ва вилоятлар ҳамда Термиз шаҳри ва туманлардан келган ҳунармандлар маҳсулотлари, миллий таомлар кўргазмаси барчада катта қизиқиш уйғотди. Турли спорт мусобақалари, бахши-оқинлар танлови, от устида кураш, чиллак, арқон тортиш, миллий кураш сингари ўнга яқин миллий халқ ўйинлари ўтказилиб, ғолиблар тақдирланди.

Қизғин баҳсларга бой бўлган кураш беллашувларида мамлакатимизнинг барча ҳудудларидан келган донгдор полвонлар ўзаро куч синашди. +90 килограмм вазн тоифасидаги баҳсларда Сурхондарё вилояти Шеробод туманилик Муҳаммадкарим Хуррамов ғолиб бўлди ва 20 миллион сўм пул мукофотини қўлга киритди. Бошқа вазн тоифасидаги ғолиб полвонлар ҳам муносиб рағбатлантирилди.

Алимурод МАМАДАМИНОВ, ўз мухбиримиз