Бу қизиқ! Бокс тарихидаги энг яхши нокаутларни биласизми? (+ВИДЕО)

Бокс спорт турида сиз рақибингизни битта зарба билан "ухлатиб қўйишингиз" мумкин. Аммо шу зарбалар бир инсоннинг умрига зомин бўлиши ҳам мумкин, камдан-кам ҳолларда бўлсада. Шундай ҳолатлар юзага келмаслиги учун ҳам реферининг жангни ўз вақтида тўхтата олиши ушбу спорт турида қадрланади.

Қуйида ХХ асрнинг энг "йиртқичона" нокаутларни томоша қилишингиз мумкин:

Жек Демпси — Луис-Анхель Фирпо, 14. 09. 1923

Бир аср аввалги бокс жангларининг деярли ҳар бири қайсидир маънода жозибалироқ бўлган. Боксчилар ҳеч қандай тактикасиз, асосийси рақибини кучи тугагунича калтаклаш мақсадида рингга чиқишган. Шундай жанглардан бирида Жек Демпси аргентиналик Луис-Анхель Фирпога қарши чемпионлик камарини ҳимоя қилади. Америкалик боксчи дастлабки раунднинг ўзида 7 марта нокдаунга учрайди, аммо тезда ўзини ўнглаб олиб, рақибини биратўла нокаутга учратади.

Рой Жонс — Монтелла Гриффин, 07. 08. 1987

Ушбу реванш жангида мухлислар ҳақиқий Рой Жонсни кўришади. Беш ой аввал ўтказилган жангда ҳам у Гриффинни нокаут қилган, аммо ҳакам уни бонгдан сўнг рақибига зарба берганликда айблаб, дисквалификация қилган. Жангнинг биринчи раундида Жонс 90 йилларнинг энг яхши боксчиларидан бири ким эканлигини кўрсатиб қўяди, ҳаммаси дастлабки раунддаёқ якунланади.

Майк Тайсон — Тревер Бейбик, 22. 11. 1986

Ушбу жанггача WBC йўналиши бўйича чемпион Тревер Бербик ҳеч қачон нокаутга учрамаган эди. "Темир Майк"ка бу жангда фаворит сифатида қаралмаган, аммо у барча тахминларни йўққа чиқара олганди. Тревер ҳақиқий нокаутчи эди, аммо Майк иккинчи раундда ким аслида бу номга муносиброқ эканлигини исботлади.

Муҳаммад Али — Жорж Форман, 30. 10. 1974

Жорж Форман бу тўқнашувга қадар 40 та жанг ўтказиб улгурган эди, у жангларининг барчасида рақибларини "ер тишлатган", буни 37 та жангда рақибларини нокаут қилганидан ҳам билсак бўлади. Жанг ўта юқори даражада бўлганидан, боксчиларнинг тезда кучи тугаб қолади. Саккизинчи раундда Али ажойиб зарбалар сериясини уюштиради ва енгилмас чемпионнинг "чироғини ўчириб қўяди". Бу жанг бокс тарихида "Чангалзордаги шовқин" дея эсланади.

Костя Цзю — Заб Жуда, 3. 11. 2001

Истисно тариқасида ХХI асрдаги жангни ҳам қўшишни афзал билдик. Ўртага енгил вазннинг учта чемпионлик камари қўйилган эди. Костя бу жангда оптимал формасида эмасди, Жуда эса аксинча. Аммо бу жангга ҳеч қандай таъсир ўтказа олмади. Жанг аввалидаёқ Цзю рақибини зарбалар серияси билан сийлайди, Жуда эса клинчдан ўзга чора топа олмасди. Иккинчи раунд якунланишига 3 секунд қолганида Заб ўнг томондан кросс зарбасини ўказиб юбориб, рингга йиқилади. Америкалик боксчи туришга ҳаракат қилади, аммо рефери бунга ҳожат қолдирмасдан, жангни якунлайди. Россиялик мухлислар талқинига кўра, бу нокаут йилнинг энг яхшиси эди.