Бу рейтингларни ким ва нимага асосланиб тузишини билмайман - Ислам Махачев. У яна нима қилиши керак?

У навбатдаги камар учун ҳимоя жангини ўтказди. Доғистонлик жангчи Александр Волкановскини шафқатсиз тарзда нокаутга учратди. Аммо жангдан кейин Pound-for-pound рейтинги маълум қилингач, кўплаб саволлар туғилди. Унда вазн тоифасидан қатъий назар, ташкилотнинг энг яхши жангчилари рейтинги тузилади. Кўпчилик Волкановски икки марта мағлуб этилгач, Махачев доминант бўлиб олишини кутиб турганди, бироқ янгниланган рейтингда Ислам бир поғона кўтарилди ва иккинчи ўринга жойлаштирилди. 

Чемпионнинг ўзи аллақачон уйга қайтиб бўлган. “Ушатайка” (россиялик спорт блогери) билан суҳбатда ушбу ҳолатга изоҳ беришга улгурди. Унинг таъкидлашича, рейтинглар қандай принцип асосида тузилишини умуман тушунмайди. “Бу рейтингларни ким ва нимага асосланиб тузушини билмайман. Биринчи рақамли P4P’ни таслим этдим, аммо улар мени биринчи поғонага жойлаштиришмади. Буни ажабланарли жойи йўқ, балки баъзи фойдалари бордир. Яна қандай йўл билан етакчи бўлиб олишимни англай олмаяпман. Агар сиз биринчи рақамли жангчини енгиб ҳам ундан пастдамисиз, мен буни изоҳлаб бера олмайман, узр”, деган Ислам.

Таъкидлаш жоизки, ташкилот Махачевни олий поғонага қўйишини ҳамма ҳам кутмаганди. Масалан, собиқ UFC жангчиси Алексей Кунченко ҳозирча Ислам P4P рейтингида етакчилик қилмаслигини тахмин қилган. “Албатта, P4P’да биринчи ўринга Жонсни қўйган бўлардим, чунки у афсона. Махачев унга тенглашиб олиши учун ҳали анча жанг ўтказиши лозим. Агар 10 марта ҳимоя жангини ўтказса, кейин ўйлаб кўрса бўлади. У яхши жангчи, бироқ ҳозирча Исламга олий ўринни бермаган бўлардим”, дейди Кунченко. Шу билан бирга, америкалик чемпион камдан-кам жанг қилади, деган аргумент пайдо бўлади. Жонс 44 ой (3ярим йилдан кўпроқ) ичида битта жанг ўтказди. Худди шу вақт ичида доғистонлик 7 марта жанг қилди, икки марта чемпионлик камарни ҳимоя қилиб, барчасида зафар қучди. 

Афтидан, Ислам P4P рейтингида биринчи ўринга қўйилмаганининг муҳим сабаби бор ва бу Жон Жонс билан Стипе Миочичнинг бўлажак жанги. Ҳатто Жонс жамоаси ичида супер юлдуз ўзининг сўнгги йилларини ўтказаётгани ҳақида миш-мишлар тарқалган. Агар UFC ташкилотчилари афсонавий жангчилардан бирини жангига 3 ҳафта қолганида олий ўриндан олиб ташлашса, ғалати бўларди. (Рейтинг эълон қилинганида ҳали Жонс - Миочич жанги бекор бўлмаганди). Махачев биринчи ўринни эгаллаши учун ҳали яна бироз вақт керак бўлади. У ўз вазнида мутлақ тенгсиз ва иккинчи камарга эга бўлишни ният қилган.

Хорижий сайт асосида Хабиб Жўрабоев тайёрлади