Бу йилги комплекс мусобақаларга тайёргарлик масаласи муҳокама қилинди

Спорт вазири Адҳам Икрамов ва Отабек Умаров бошчилигидаги Ўзбекистон МОҚ раҳбарияти иштирокида ушбу йил кутиб турган ана шундай ўйинларга тайёргарлик мавзусида йиғилиш ўтказилди. 

Йиғилиш аввалида Спорт вазирлиги бошқарма бошлиғи Акром Низаметдинов 2025 йил кутиб турган комплекс мусобақалар, ташкилий қўмита талабларига кўра уларда иштирок этиш бўйича ёш чегаралари, Ўйинларга киритилган спорт турлари каби умумий маълумотларни бериб ўтди.

Даставвал, 7-14 февраль кунлари Хитойнинг Харбин шаҳрида ўтиши режалаштирилган IХ қишки Осиё ўйинларига олиб борилаётган ҳозирлик кўриб чиқилди. 

Унда Қўмита раиси ўринбосари Шерзод Ташматов Ўйинларда иштирок этиши кутилаётган атлетлар, спорт турлари, терма жамоаларнинг тайёргарлиги борасида батафсил маълумот берди. Шунингдек, ҳар бир спортчининг қайси санада Харбинга етиб бориши, олиб бораётган машғулотлари ҳақида ҳам тўхталиб ўтди.

Ўз ўрнида, Осиё Олимпия кенгаши вице-президенти, МОҚ раисининг биринчи ўринбосари Отабек Умаров делегация аъзоларининг тайёргарлиги аъло даражада бўлиши лозимлиги, мазкур мусобақа Милан-Кортина-2026 қишки Олимпия ўйинларига ҳозирлик кўраётган атлетларимизнинг имкониятини кўздан кечиришга ёрдам беришини таъкидлади. 

Қолаверса, спортчиларимизнинг манзилга керакли муддатларда етиб боришларини таъминлаш, уларнинг экипировкаларини яна бир карра назоратдан ўтказиш, Атлетлар шаҳарчасида делегация аъзолари учун барча зарур шароитларни яратиш каби йўналишлар бўйича тавсиялар берилди.

Суҳбатда комплекс мусобақаларга ёшлар терма жамоаси аъзоларини ҳам кенг жалб қилиш, бу орқали уларнинг маҳорати ва халқаро тажрибасини ошириб бориш муҳимлиги борасида фикрлар билдирилди.