Бугун 15 ёшли халқаро гроссмейстеримиз Нодирбек афсонавий Вишванатан Ананд билан ҳисоб-китоб қилади

Мукофот жамғармаси 433 000 АҚШ долларини ташкил этувчи Grand Swiss турнирида Ўзбекистон шарафини 17-жаҳон чемпиони Рустам Қосимжонов ҳамда 15 ёшли халқаро гроссмейстеримиз Нодирбек Абдусаттаров ҳимоя қилмоқда. Қосимжонов 2657, Абдусаттаров эса 2608 рейтинг очкосига эга. 

Мусобақада муваффақиятли дона сураётган истеъдодли шахматчимиз, 15 ёшли халқаро гроссмейстер Нодирбек Абдусатторов 5 имкониятдан 3,5 очко жамғариб, қўшимча кўрсаткичларга кўра 10-ўринни эгаллаб турибди. Турнирда 106-рақам остида таснифланган ҳамюртимиз кетма-кет икки халқаро гроссмейстерни мағлуб этишнинг уддасидан чиқди. 

Бугун Абдусатторов 3 очко жамғариб турган собиқ жаҳон чемпиони, ҳиндистонлик халқаро гроссмейстер Вишванатан Ананд (2765)га қарши қора доналарда ҳаракат қилади. Бу баҳсга бўлган қизиқиш жуда ҳам юқори.