Бугун Абдусатторов ва Синдаров жамоалари финалда Global Chess League бош соврини учун ўйнайди

Мукофот жамғармаси бир миллион АҚШ долларини ташкил қилувчи мусобақада таркибига жами 36 нафар машҳур гроссмейстерни жамлаган 6 та жамоа бош соврин учун баҳсларга киришганди. Бугун ушбу турнирда ҳал қилувчи финал учрашуви ўтказилади. 

Қувонарлиси, ҳамюртларимиз Нодирбек Абдусатторов ва Жавоҳир Синдаров ўйнаётган жамоалар финал йўлланмасини қўлга киритишди. Таркибида Нодирбек Абдусатторов бўлган PBG Alaskan Knights жамоаси муддатидан аввал финал чиптасини қўлга киритиб улгурганди. Шунга қарамай, PBG Alaskan Knights кеча Ҳикару Накамура бошчилигидаги American Gambits жамоасини йирик 14:5 ҳисобида доғда қолдирди. Абдусатторов қора доналарда польшалик Ян-Криштофф Дудек билан дуранг ўйнади. 

Иккинчи финалчи номини аниқлаб берган учрашувда эса Жавоҳир Синдаров қаҳрамонга айланди. Айнан унинг сўнги учрашувдаги ғалабаси Triveni Continental Kings жамоасини финалга олиб чиқди. Triveni Continental Kings Магнус Карлсен сардорлигидаги Alpine Sg Pipers жамоасини 9:7 ҳисобида енгди. Жавоҳир бельгиялик гроссмейстер Даниэль Дардани 3:0 ҳисобида таслим эта олди. Сардорлар ўртасидаги учрашувда эса Магнус Карлсен Алиреза Фирузжадан 4:0 ҳисобида устун келди. 

Демак, бугун Global Chess League 2024 бош соврини Нодирбек Абдусатторовнинг Alaskan Knights жамоаси Жавоҳир Синдаров ўйнаётган Triveni Continental Kings жамоасига қарши баҳс олиб боради. Чемпион жамоа 500 000 АҚШ долларини қўлга киритади. Бонус сифатида яна 50 000 доллар чемпион жамоага тақдим этилади. Иккинчи ўрин соҳиблари 250 000, учинчи ва тўртинчи ўринни эгаллаган жамоалар эса 100 000 АҚШ долларига эга бўлади.  

PBG Alaskan Knights жамоаси таркиби: Аниш Гири (Нидерландия), Нодирбек Абдусатторов (Ўзбекистон), Шахрияр Мамедьяров (Озарбайжон), Тань Чжунъи (Хитой), Алина Кашлинская (Польша), Ниҳал Сарин (Ҳиндистон)

Triveni Continental Kings жамоаси таркиби: Алиреза Фирузжа (Франция), Вей Йи (Хитой), Теймур Ражабов (Озарбайжон), Александра Костенюк (Швейцария), Валентина Гунина (Россия), Жавоҳир Синдаров (Ўзбекистон)