Бугун БАА чемпионатида ўзбеклар дербиси - Ҳамдамов Ғаниевга қарши + ПРЕВЬЮ

Мазкур учрашувнинг ўзбекистонлик мухлислар учун аҳамиятлиси шундаки, бу турда улар ҳамюртларимизнинг бевосита ўзаро тўқнашувига гувоҳ бўлишади. Гап Азиз Ғаниев ва Достон Ҳамдамов ҳақида кетмоқда. 

Яқиндагина Дубайнинг "Ал Наср" жамоасига кўчиб ўтган Ҳамдамов бир йилдан ошиқ давомида амирликларда тўп тепиб келаётган Ғаниевнинг "Шабаб Ал Аҳли" жамоасига қарши сафарда майдонга чиқади. Жамоалар шу кунга қадар барча мусобақаларда ўзаро 37 маротаба тўқнашишган. 20та ўйинда "Шабаб Аль Ахли" ғалаба қозонган бўлса, 8 та ўйинда "Ал Наср"нинг қўли баланд келган. 9 та учрашувда томонлар муроса кўчасини танлашган. 

Майдон эгалари рақиб дарвозасига 67 бор йўл топган, меҳмонлар эса 47та гол урган. "Шабаб Аль Ахли"нинг энг йирик ғалабаси 5:0, Юрчич шогирдларининг энг йирик ғалабаси эса 4:0. Энг йирик ҳисобдаги дуранг 3:3 кўринишида бўлган. 

Мезбонлар 12 та учрашувда 16 очко жамғарган ҳолда 8-ўринда кетмоқда. Бу жамоага яқинда БАА футболида катта обрўга эга бўлган мутахассис Маҳди Али бош мураббий этиб тайинланди. Испаниялик Жерард Сарагосага эса қониқарсиз натижалар туфайли чиқиш эшиклари кўрсатилди. Ўзбекистонлик футболчи Азиз Ғаниев барча учрашувда майдонга тушди ва 1та гол уриш билан бирга жамоадошларининг 4та голига ассистентлик қилди. Ҳакамлар томонидан 2 бор сариқ карточка билан жазоланди. Жамоадан 19 ёшлик Игорь Жесус 10та гол билан тўпурарлар пойгасида "Шаржа" ҳужумчиси Веллитон (11та гол)дан сўнг иккинчи поғонани эгалламоқда. 

Достон Ҳамдамов тўп тепаётган "Ал Наср"нинг қайд этаётган натижалари чакки эмас. Унинг жамоаси совринли ўринлар учун курашни давом эттирмоқда. 12та учрашувда 24 очко жамғарган ва 3-ўринни банд қилиб турибди. Жамоани айни пайтда хорватиялик Крунослав Юрчич бошқармоқда. Аргентиналик футболчи Себастьян Тальябуэ 5та гол билан жамоасининг тўпурарласи орасида етакчиликни қўлига олган. Ҳамдамов бугун БАА чемпионатида дебютини ўтказиши кутилмоқда. 

Бундан ташқари Тошкент вақти билан соат 18:00да ўзбекистонлик футболчи Отабек Шукуров ўйнаётган "Шаржа" клуби ўз майдонида "Иттиҳод Калба"ни қабул қилади. "Шаржа" 12та ўйиндан 29 очко тўплаб мусобақа жадвалининг биринчи поғонасида бормоқда.