Бугун Бекзод Абдураҳмонов, Ғуломжон Абдуллаев ва Рустам Шодиев ЖЧ медаллари учун гиламга чиқади

Кеча жаҳон чемпионатининг илк куни курашган эркин курашчиларимиздан Жавраил Шапиев бронза медали ҳамда Париж-2024 Олимпиадаси учун гиламга чиқиш имкониятини қўлга киритди. -86 кг вазн тоифасидаги ҳамюртимиз 1/16 финалда польшалик Себастьян Йезирзански (4-1), 1/8 финалда туркиялик Осман Госен (11-0), 1/4 финалда япониялик Ҳаято Ишигурони мағлубиятга (15-5) учратди. Ярим финалда эса эронлик Ҳассан Язданичаратига ютқазиб қўйди (0-10). Шапиевнинг бронза медали учун баҳсдаги рақиби ўтиш босқичидан сўнг аниқланади. Жавраил ғалаба қозонган тақдирда, бронза медали билан бирга Париж-2024 Олимпиадаси йўлланмасини ҳам қўлга киритади.  

Бугун эркин кураш баҳсларининг иккинчи куни олимпия тоифасига кирувчи -57 ва -74 кг, ноолимпия вазни ҳисобланган -79 ҳамда -92 кг вазн тоифаларида саралаш беллашувлари ўтказилади. Бугунги баҳсларда Токио Олимпиадаси совриндори Бекзод Абдураҳмонов, олимпия ўйинлари иштирокчиси Ғуломжон Абдуллаев ҳамда Рустам Шодиевга мухлислик қиламиз. 

Ҳамюртларимизнинг илк босқичдаги рақиблари:

-57 кг: Ғуломжон Абдуллаев - Гаян Эканаяке (Шри-Ланка) 

-74 кг: Бекзод Абдураҳмонов - Камил Римитски (Польша) 

-92 кг: Рустам Шодиев - Михал Беилавски (Польша)