Бугун Бутунжаҳон шахмат Олимпиадасида Ўзбекистон - Ҳиндистон учрашуви бўлиб ўтади

Бугун 9-турда амалдаги Олимпиада чемпиони ҳисобланган Ўзбекистон эркаклар терма жамоаси ҳали мағлубият ва муроса нималигини билмай келаётган Ҳиндистонга қарши баҳс олиб боради. Ҳиндистонлик гроссмейстерлар ўтказилган 8 та учрашувнинг барчасида ғалаба қозонишган. 

Кеча 8-турда улар энг яқин таъқибчилари бўлиб келган Эрон терма жамоасини 3,5:0,5 ҳисобида доғда қолдиришди. Ўзбекистон эса драматик кечган баҳсда Сербиядан 2,5:1,5 ҳисобида устун келди. Учта дурангдан кейин Нодирбек Абдусатторов жамоамизга муҳим ғалабани тақдим этди. У дурангли партияни ғалабага айлантириб юборди. 

Бугун ўтказиладиган Ҳиндистон - Ўзбекистон учрашуви катта эҳтимол билан чемпион номини аниқлаб бериши мумкин. Тўғри, ҳали олдинда Олимпиаданинг 2 та тури бўлади, лекин бу баҳс жуда кўп нарсага ойдинлик киритиб беради. Қолаверса, ҳиндистонлик шахматчиларнинг биздан олдинги Олимпиада учун аламлари ҳам бор. 

9-турнинг марказий учрашувлари:

Ҳиндистон - ЎЗБЕКИСТОН 

АҚШ - Венгрия

Хитой - Эрон 

Норвегия - Словения

Арманистон - Германия

Англия - Вьетнам

Туркия - Испания