Бугун ҳам Ислом бирдамлиги ўйинларида 4 та спорт турида ҳамюртларимизга мухлислик қиламиз

Хабарингиз бор, ислом оламидаги ушбу нуфузли мусобақада Ўзбекистон терма жамоаси ҳам катта спорт делегацияси билан иштирок этяпти. Бугун мусобақанинг навбатдаги куни ўзбекистонлик атлетлар худди кеча бўлганидек, 4 та спорт турида ташкил этиладиган баҳсларда ўз маҳоратларини намойиш этадилар. 

Спортчиларимизнинг бугунги иштирокини велоспортчиларимиз бошлаб беришади. Велотрекнинг омниум баҳсларида Ольга Забелинская, Маргарита Мисюрина, Алексей Фомовский ва Ботир Исматов юртимиз шарафини ҳимоя қиладилар. Улар куннинг биринчи ярмида ўтказиладиган саралаш баҳсларида стартга чиқишади. Забелинская кеча терма жамоамизга олтин медаль тақдим этиб улгурганди. 

Бугун ҳам пара сузиш мусобақалари давом эттирилади. Кеча 100 метр масофага баттерфляй усулида ўтказилган баҳсларда чемпионлик шоҳсупасига кўтарилган Азизбек Бойназаров бугун 200 метр масофага аралаш сузишда кечаги натижасини такрорлашга уриниб кўради. 

Куннинг иккинчи ярмида эътиборимиз спорт турлари маликаси ҳисобланган енгил атлетика ҳамда волейбол беллашувларига қаратилади. Атлетларимиздан Оскар Кучмурадов (100 м), Дарья Резниченко ва Роксана Худоёрова (иккиси ҳам узунликка сакраш), Лайло Аллаберганова (100 м), Жасмина Мансурова (лангарчўпга таяниб сакраш), Зарина Носиржонова (босқон улоқтириш), Фарида Солиева (400 м), Евгений Фадеев (5 000 м) ва Достон Ражабов (ядро улоқтириш) медаллар учун баҳсларга киришадилар.

Бугунги иштирокимизни волейбол бўйича Ўзбекистон аёллар терма жамоаси иштирокидаги ўйин якунлаб беради. Қизларимиз мезбонлар Туркия терма жамоасига қарши баҳс олиб боришади.