Бугун “Ҳумо Арена”да Тошкент Гран-Приси старт олади

Дунёнинг 73 давлатидан 400 нафардан зиёд полвонлар иштирок этадиган ва соврин жамғармаси 100 минг АҚШ долларини ташкил этувчи мусобақага жаҳон дзюдо ҳамжамияти томонидан бўлган қизиқиш жуда ҳам юқори. 

Биринчи галда Тошкент Гран-приси дзюдо ватани Японияда ўтказилган катталар ўртасидаги Жаҳон чемпионатидан кейинги мусобақа ҳисобланади. Айнан 25 августдан 2 сентябргача оралиқда ўтган жаҳон чемпионатида Олимпиаданинг муҳим рейтинг очколарини жамғара олмаган дзюдочиларнинг аксарияти кемтикни тўлдириш учун ҳам Тошкентга келишган.   

Тошкент Гран-приси ғолиблари 700 рейтинг очкосини қўлга киритишади. Кумуш медал эгалари 490, бронза медали билан тақдирланган дзюдочилар эса 350 очкога эга бўлишади. Шунингдек, 5-ўринга 252, 7-поғонадан жой олганларга 182 очко тақдим этилади. 

Халқаро дзюдо федерацияси (IJF) қоидаларига мувофиқ мезбон давлат мусобақада ҳар бир вазн тоифасида тўрт нафардан дзюдочи билан иштирок этиш ҳуқуқига эга. Табиийки, Ўзбекистон терма жамоаси мураббийлари ҳам бу имкониятдан фойдаланишади. Тажрибали спортчилар билан бирга истеъдодли ёшларга ҳам ўзларини кўрсатиш учун имконият тақдим этилади. 

Тошкент Гран-присида юртимиз шарфини жами 48 нафар дзюдочимиз ҳимоя қилади. Улардан 28 нафари эркак, 20 нафари аёл спортчилардир. 

Эркаклар: -60, -66, -73, -81, -90, -100, +100 кг

Аёллар: -48, -52, -57, -63, -70, -78, +78 кг 

20-22 сентябрь кунлари ўтказиладиган баҳслар соат 10:30дан бошланади. Ҳар куни соат 17:00дан медаллар учун кечадиган финал беллашувларига старт берилади.