28 июл 09:49
Янгиликлар

Спорт курашлари

Бугун икки курашчи-қизимиз бронза медали учун баҳс олиб боради

Рим шаҳрида спорт курашлари (эркин, юнон-рум ва аёллар кураши) бўйича ўсмирлар (U 17) ўртасидаги Жаҳон чемпионати давом этмоқда.

Бугун аёллар кураши бўйича беллашувлар давом эттирилади. 57 кг вазн тоифасида юртимиз шарафини ҳимоя қилаётган Улмекен Есенбаева ярим финалда япониялик Совака Учидага имкониятни бой (0-4) бериб қўйди. Бугун у жаҳон чемпионатининг бронза медали учун гиламга чиқади. Улмекеннинг рақибаси ўтиш беллашувларидан сўнг аниқланади.

Чорак финалда ҳиндистонлик Ритикага ютқазган Гулнура Русланова (43 кг) бугун бронза медали йўлидаги ўтиш баҳсида италиялик Мелисса Дорофтейга қарши гиламга чиқади. Ғалаба қозонган тақдирда, бронза медали учун украиналик Анастасия Полска билан ҳисоб-китоб қилади.