Бугун икки юнон-рум курашчимиз Жаҳон чемпионати медали учун курашади

Одатдагидек, беллашувларни юнон-рум кураши вакиллари бошлаб беришди. Дунё биринчилигининг биринчи куни Ўзбекистон юнон-рум кураши терма жамоасининг икки вакили медаллар учун курашга киришди.

55 кг вазнда юртимиз шарафини ҳимоя қилаётган Хуршидбек Нормуҳаммадов 1/16 финалда италиялик Сальваторе Материани 8-0, 1/8 финалда Хитой Тайпейи вакили Шу Вей Чангни 11-0, 1/4 финалда қозоғистонлик Нариман Бекимовни 10-0 ҳисобида доғда қолдирди. Ярим финалда эса ҳиндистонлик Суражга 3-7 ҳисобида ютқазиб қўйди. Бугун у бронза медали учун гиламга чиқади. Унинг рақиби ўтиш баҳсидаги Александру Варзари (Руминия)/Коҳаку Каназава (Япония) учршувидан сўнг маълум бўлади.   

Яна бир юнон-рум курашчимиз Беҳруз Барноевда ҳам жаҳон чемпионатининг бронза медалини қўлга киритиш имкони бор. Бунинг учун 65 кг вазндаги курашчимиз аввалига ўтиш беллашувида қозоғистонлик Сергази Абдихадирни мағлуб этиши шарт. Барноев 1/16 финалда молдовалик Артур Борсни 2-1 ҳисобида енгиб, нимчорак финалда эронлик Муҳаммад Пианига имкониятни бой бериб қўйганди.