Бугун "Миллий спорт мукофоти-2024" топшириш маросими бўлиб ўтади

Олимпиада йили сифатида тарихга муҳрланаётган 2024 йилнинг энг яхшиси бўлиш учун номзодлар керагидан ҳам кўп. Париж-2024 Олимпиадасининг ҳар бир қаҳрамони энг яхши бўлишга ҳақли. Фақат улар орасидан бир нафаригина ўз йўналишида энг яхши деб топилади. 

Ҳар йилгидек Ўзбекистон Миллий олимпия қўмитаси Спорт вазирлиги билан ҳамкорликда бир нечта номинацияда ғолибларни эълон қилади. Лекин қандай йўл билан буни амалга ошириши бизга номаълум. Балки, ёпиқ овоз бериш йўли билан аниқланар. Агар шундай бўлган тақдирда, номзодларга кимлар овоз беради? Буниси ҳам биз учун мавҳум.  

Тахминимизча, 22 ёшидаёқ икки карра Олимпиада чемпиони бўлган таэквондочимиз Улуғбек Рашитов "Йилнинг энг яхши эркак спортчиси", Диёра Келдиёрова эса "Йилнинг энг яхши аёл спортчиси" деб топилса керак. Бу қолган Олимпиада чемпионларига ҳурматни сақлаган ҳолда айтилган тахмин холос. 

Рашитов бир неча кун олдин Бутунжаҳон таэквондо федерацияси (WТ) томонидан 2024 йилнинг "Энг яхши эркак спортчиси" деб эълон қилинганди. Диёра Келдиёрова ҳам Халқаро дзюдо федерацияси (IJF) томонидан эълон қилинган сўровномада "Йилнинг энг яхши аёл дзюдочиси" бўлиш учун асосий даъвогар бўлиб турибди. Диёра ёзги Олимпия ўйинлари тарихидаги илк аёл Олимпиада чемпиони, қолаверса, Ўзбекистон дзюдоси тарихида олимпия ўйинлари чемпион бўлган илк спортчи ҳам ҳисобланади. Ана шу омиллар Улуғбек ва Диёрага қўшимча устунлик беради. 

Хуллас, бугун Ўзбекистоннинг 2024 йилдаги энг яхшиларини билиб оламиз. Тахмин қилиб кўрингчи, ким Олимпиада йилининг энг яхшилари қаторида "Миллий спорт мукофоти-2024"да эътироф этилади?  

Эслатиб ўтамиз, Ўзбекистон спорт делегацияси биз учун тарихий бўлиб қолган Париж-2024 Олимпиадасида 8 та олтин, 2 та кумуш, 3 та бронза медали билан умумжамоа ҳисобида 13-ўринни эгаллаганди.