Бугун Осиё чемпионатининг сўнгги куни яна 5 юнон-рум курашчимизга мухлислик қиламиз

Бугун қитъа чемпионатининг сўнгги куни юнон-рум кураши бўйича яна 5 та вазн тоифасида ғолиб ва совриндорлар номи маълум бўлади. Кечаги кунги беллашувларда классикларимиздан Дониёрхон Накибов (-77 кг) ва Раҳимжон Узоқов (-87 кг) бронза медалларини қўлга киритишди. Бронза медали учун гиламга чиққан Жасурбек Ортиқбоев (-55 кг) ва Исломжон Раҳматов (-130 кг) рақибларига имкониятни бой беришди.  

Бугун Бишкек гиламларида Илҳом Баҳромов (-60 кг), Шермуҳаммад Шарибжонов (-67 кг), Абдулло Алиев (-72 кг), Муҳаммадқодир Расулов (-82 кг) ва Абдуқодир Жалилов (-97 кг) Осиё чемпионати медаллари учун курашишади. 

Беш кунлик беллашувлар якунига кўра ҳали спорт курашлари терма жамоамизда олтин медаль йўқ. Эркин курашчиларимиз 2 та кумуш, 1 та бронза медалини қўлга киритишган бўлса, юнон-рум курашчиларимиз кеча 2 та бронза медалини терма жамоамизга тақдим этишди. Аёллар кураши вакилалалари эса Ўзбекистонга қуруқ қўл билан қайтишди.  

Бугун курашадиган классикларимиз учун қуръа натижалари:   

-60 кг: 1/8 финал. Илҳом Баҳромов - Хёк Сонг (КХДР)/Али Аббас Албидхан (Ироқ)

-67 кг: Квалификация раунди. Шермуҳаммад Шарибжонов - Ман Гванг Сон (КХДР)

-72 кг: 1/4 финал. Абдулло Алиев - Бегмират Нобатов (Туркманистон)

-82 кг: 1/4 финал. Муҳаммадқодир Расулов - Султан Али Моҳд Ейд (Иордания)/Евгений Поливадов (Қозоғистон)

-97 кг: Квалификация раунди. Абдуқодир Жалилов - Бадамдорж Балтмунҳ (Мўғулистон)