Бугун рапид бўйича янги жаҳон чемпиони аниқланади. Шахматчиларимизнинг бугунги илк турдаги рақиблари маълум

Бугун рапид баҳсларида жаҳон чемпиони аниқланади ва қувонарлиси, гроссмейстерларимиз Нодирбек Абдусатторов ва Жавоҳир Синдаров ҳам чемпионлик учун даъвогар бўлиб турибди. Ҳар қандай ҳолатда ҳам рапид ва блиц йўналишида янги жаҳон чемпиони аниқланади. Кийими сабаб жаҳл устида мусобақани тарк этган Магнус Карлсен ҳар иккала йўналишда амалдаги жаҳон чемпиони эди. У ўтган йили Самарқандда жаҳон чемпионлигини қўлга киритганди. 

Бугун 10-турда Нодирбек Абдусатторов оқ доналарда ўзи сингари 6,5 очко тўплаган FIDE байроғи остида ҳаракат қилаётган россиялик Денис Лазавикка қарши баҳс олиб боради. Жавоҳир Синдаров ҳам оқ доналарда ўйнайди. Унинг рақиби анча номдор шахматчи россиялик Ян Непомняший бўлади. Синдаров ҳали мағлубиятга учрамаган камсонли иштирокчилардан бири бўлиб турибди. 

Тўрт нафар қатнашчи 7 тадан очко жамғариб, турнир жадвалида пешқадамлик қиляпти. Бугун улар бир-бирларига қарши дона суришади. Бу эса Топ-10`таликда бораётган қолган шахматчиларга қўшимча имконият тақдим этади. 

Шахматчиларимизнинг 10-турдаги рақиблари

Жавоҳир Синдаров (Ўзбекистон, 2655) - Ян Непомняший (FIDE, 2758)

Нодирбек Абдусатторов (Ўзбекистон, 2740) - Денис Лазавик (FIDE, 2553)

Хайк Мартиросян (Арманистон, 2609) - Жаҳонгир Воҳидов (Ўзбекистон, 2466)

Тигран Петросян (Арманистон, 2601) - Муҳиддин Мадаминов (Ўзбекистон, 2456)

Шамсиддин Воҳидов (Ўзбекистон, 2540) - Глеб Дудин (Венгрия, 2436)

Бугун аёллар ўртасидаги рапид баҳсларида ҳам чемпион ва совриндорлар аниқланади. Жаҳон чемпионатида қатнашаётган ягона аёл шахматчимиз Афруза Ҳамдамова (2188) 9-турда қора доналарда хитойлик гроссмейстер Жу Жинер (2449)га қарши баҳс олиб боради. Афруза 8 имкониятдан 5,5 очко тўплаб, қўшимча коэфицентларга кўра 15, Жу эса 5 очко билан 20-ўринни банд этган. 

Гроссмейстерлар Жу Вен Жун (Хитой, 2536), Ҳарика Дроновалли (Ҳиндистон, 2416) ва Ҳампи Конеру (Ҳиндистон, 2431) 6,5 тадан очко жамғариб, кучли учликда боришяпти. Бугун 9-турда Вен Жун қора доналарда Конеру билан ҳисоб-китоб қилади. АҚШ шарафини ҳимоя қилаётган Гулруҳбегим Тоҳиржонова (2307) 9-турда оқ доналарда польшалик Ливия Ярокага қарши ўйнайди. Гулруҳбегим 4 очко билан 63-поғонадан жой олган.