Бугун Рио Олимпиадаси чемпиони Шаҳобиддин Зоиров узоқ муддатдан кейин проф боксдаги навбатдаги жангини ўтказади

Оқшомнинг марказий жанги оғир вазн тоифасида россиялик чарм қўлқоп устаси Муслим Гажимагомедов ҳамда Хитой вакили Заохин Чжанг ўртасида WBA чемпионлик камари учун кечади.

Биз учун аҳамиятлиси, турнирнинг асосий кардида ўзбекистонлик боксчи, Рио-2016 Олимпиадаси ғолиби — Шаҳобиддин Зоиров рингга кўтарилади. Ҳамюртимизга россиялик таниқли боксчи Дмитрий Двали рақиб бўлади. Жанг 53,5 кг вазн тоифасида 8 раунд этиб белгиланган бўлиб, асосий кардни очиб беради. Ушбу жанг натижаси боксчиларнинг профессионал рекордига киритилади.

Серпухов шаҳрида айнан ушбу мусобақа учун мўлжаллаб қурилган "IBA Coliseum" мажмуасида ўтадиган турнир Тошкент вақти билан соат 21:00 да бошланади.

Маълумот учун, Шаҳобиддин Зоиров шу кунгача проф боксда бешта жанг ўтказиб, уларнинг барчасида ғалаба қозонган. У проф рингдаги сўнгги жангини 2022 йил 13 август куни Тошкентда Герсон Лариосга қарши ўтказиб, биринчи раунддаёқ ғалаба қозонган эди.