Бугун Tata Steel Chess бошланади. Синдаров амалдаги жаҳон чемпионига, Абдусатторов 14 ёшли гроссмейстерга қарши дона суради

Турнирнинг кучлилар жам бўлган "Мастерс" гуруҳида дунёнинг етакчи 14 нафар гроссмейстери, улар қаторида ҳамюртларимиз Нодирбек Абдусатторов ва Жавоҳир Синдаров ҳам бош соврин учун баҳсларга киришади. 

Бугун ўтказиладиган 1-турдаёқ амалдаги Жаҳон кубоги соҳиби Жавоҳир Синдаров амалдаги жаҳон чемпиони ҳиндистонлик Гукеш Доммараджуга қарши оқ доналарда ўйнайди. Нодирбек Абдусатторов эса қора доналарда дунёнинг энг ёш тўртинчи гроссмейстери, туркиялик 14 ёшли Ягиз Каан Эрдогмушга қарши қора доналарда ҳаракат қилади. 

Ўзига хос ўзбек дербиси мусобақанинг 9-турига тўғри келмоқда. Жавоҳир унда оқ доналарда Нодирбекка қарши баҳс олиб боради. Tata Steel Chess турнирининг амалдаги чемпиони ҳиндистонлик Рамешбабу Праггнанандҳа ҳисобланади. Прагг сингари 8,5 очко жамғарган Гукеш кумуш, Нодирбек Абдусатторов 8 очко билан бронза медалини қўлга киритган эди. Синдаров ўтган йилги мусобақада иштирок этмаганди.     

Tata Steel Chess 2026. 1-тур жуфтликлари:

Аравиндх Читамбарам (Ҳиндистон) — Маттиас Блюбаум (Германия)

Ханс Ниеманн (АҚШ) — Владимир Федосеев (Словения)

Винсент Кеймер (Германия) — Аниш Гири (Нидерландия)

Жавоҳир Синдаров (Ўзбекистон) — Гукеш Доммаражу (Ҳиндистон)

Йорден ван Форест (Нидерландия) — Тай Даи Ван Нгуэн (Чехия)

Аржун Эригаиси (Ҳиндистон) — Рамешбабу Прагнанандха (Ҳиндистон)

Ягиз Каан Эрдогмуш (Туркия) — Нодирбек Абдусатторов (Ўзбекистон)