Бундеслигада сермаҳсуллик рекорди ўрнатилди

Бу Бундеслиганинг ушбу оралиқдаги янги рекорди ҳисобланади.

Бундеслига расмий сайти статистикасига кўра, бунгача бўлган энг юқори кўрсаткич 170 та голни ташкил этган ва у 1984/85 йилги мавсумдан бери сақланиб келаётганди. Жорий мавсумнинг 45 та учрашувида жамоалар ҳар бир ўйинда ўртача 3,82 тадан тўп киритишган.

Биргина бешинчи турнинг ўзида 35 та гол қайд этилди. "Лейпциг" "Айнтрахт"ни 6:0 ҳисобида тор-мор этган бўлса, "Байер" "Майнц" устидан 4:3 ҳисобида ғалаба қозонди. Айнан шу тур якунланганидан кейин 42 йил олдин ўрнатилган кўрсаткич янгиланди.

12 октябрь эрталабки ҳолатга кўра, Германия чемпионати Европанинг кучли бешлик лигалари орасида ўртача сермаҳсуллик бўйича етакчилик қилаётгаyди. Испания Ла Лигасида бу вақтга келиб жамоалар ҳар бир баҳсда ўртача 3,04 тадан гол ураётганди (таққослаш учун Испания чемпионатининг 69 та ўйини ҳисобга олинган).

Бундеслиганинг энг сермаҳсул жамоаси 16 та гол билан "Бавария" бўлиб турибди. "Лейпциг" ҳисобида 15 та, "Байер" ва "Фрайбург"да эса 14 тадан гол мавжуд. Леверкузенликлар ҳужумчиси Патрик Шик бешта ўйинда бешта гол уриб, тўпурарлар пойгасида пешқадамлик қилмоқда. Майкл Олисе, Кристофер Нкунку ва Никлас Фюллькруг ҳисобида эса тўрттадан гол бор.

Бундеслигада тўлиқ бир мавсум бўйича ўртача сермаҳсуллик рекорди ҳар бир ўйинга 3,58 та голни ташкил этади ва бу 1983/84 йилги чемпионатга тегишли. Ҳозирги 3,82 кўрсаткичи эса фақатгина дастлабки беш тур натижаларига асосланган.