Буни кўриш керак: 2010-2020 йиллар оралиғидаги энг "йиртқичона" нокаутлар

Бокс спорт турида охирги ўн йиллик давомида энг чиройли нокаутларнинг гувоҳига айландик. Боксда авваллари куч кўп нарсани ҳал қилар эди, эндиликда эса боксчилар тактикага ҳам эътибор бера бошлашди, наздимизда. Ҳозирда рақибингизнинг заиф нуқталаридан фойдаланиб ҳам уни мағлуб эта олишингиз мумкин. Ва ёдингизда тутинг, рақибингизни биргина зарба орқали ҳам "ухлатиб қўйишингиз" мумкин. Эътиборингизга 2010-2020 йиллар оралиғидаги энг яхши нокаутларни ҳавола қиламиз. Демак, томоша қилинг!

Хуан Мануэль Маркес — Мэнни Пакьяо (08. 12. 2012)

Бу икки боксчи бир-бирини жуда яхши билар эди, ахир бу уларнинг нақ тўртинчи жанги эди-да, ўзиям. Аввалги учта жангнинг барчасида Маркес омадсизликка учраганди. Тўртинчи жангда у ҳаммасини узил-кесил ҳал қилиш ниятида эди. Жангнинг олтинчи раунди давом этаётган бир паллада Маркес Пакьяога жуда кучли зарба йўллайди, Мэнни бу зарбадан сўнг бир неча дақиқа ўзига кела олмайди.

Владимир Кличко — Кубрат Пулев (15. 11. 2014)

Владимир Кличко ўша пайтда оғир вазнни назорат қилар эди, у вақти келиб шу вазндаги камарларнинг барини ўзиники қилиб олиши ҳам мумкин эди. Жангнинг олтинчи раундида Кличконинг рақиби юзига йўллаган зарбаси туфайли Пулев қайтиб ўрнидан тура олмайди. ESPN версиясига кўра бу 2014 йилнинг энг яхши нокаути эди.

Александр Поветкин — Диллиан Уайт (22. 10. 2020)

Бокс, Поветкин, нокаут — бу уч сўзни ҳеч қачон бир-биридан айириб бўлмайди. "Россия рицари" ажойиб зарбалар арсеналига эга эди. Диллиан Уайт ҳам юлдуз боксчи эди, аммо Поветкин уни чемпионлик жангида мағлуб эта олди. Уайт бутун жангда фаворит бўлиши кутилган эди, бироқ бешинчи раундда россиялик жангчининг апперкот зарбаси барча тахминларни йўққа чиқарди.

Геннадий Головкин — Нобухиро Исида (30. 03. 2013)

Ўрта вазн тоифасидаги энг яхши боксчилардан бири бу шубҳасиз Геннадий Головкин эди. 2013 йилда унинг тажрибали Исидага йўллаган зарбаси анча машҳур бўлиб кетади, япониялик боксчининг шу зарбадан сўнг ўзига келиши қийин кечади.

Сауль Альварес — Амир Хан  (2. 05. 2016)

WBC камари учун кечган жангда Хан яққол устунликка эришиши кутилган эди. Бироқ Сауль Альварес рақибига кетма-кет зарбалар йўллайди. Ўнг томондан йўлланган хук зарбаси Амирнинг кўз ўнгига бутун ҳаётини келтириб юборган бўлса ажабмас.