Бутунжаҳон армия ўйинлари. Бекмурод Олтибоев вице-чемпион!

Ҳозиргина армия ўйинларининг дзюдо мусобақаси +100 кг вазн тоифаси баҳсларида финал беллашуви якунланди. Олтин медаль учун кечган учрашувда ҳамюртимиз Бекмурод Олтибоев россиялик Инал Тацоевга қарши татамига чиқди. Кучли рақибга қарши баҳсда Бекмурод мағлубиятга учради ва мусобақанинг кумуш медалини қўлга киритди.  

Таққослайдиган бўлсак, Олтибоев дунё рейтингида 14, Тацоев эса 7-ўринни эгаллаб турибди. Россиялик дзюдочи олимпия рейтингининг 12-поғонасидан жой олган. Финалда тажриба ва омад ўз сўзини айтди.

Маълумот учун, Бекмурод Олтибоев финалга қадар мўғулистонлик Ҳутаг Тсогтгерел, россиялик Антон Брачев, иорданиялик Муҳаммад Алфрух, Доминикан Республикаси вакили Хосе Мануэль Нова Алкантарани мағлубиятга учратган эди.  

Эслатиб ўтамиз, бу Ўзбекистон дзюдо терма жамоасининг Бутунжаҳон Армия ўйинларидаги олтинчи медали бўлди. Бугун Гулноза Матниязова бронза медалига эга чиққан эди. Кеча эса -66 кг вазн тоифасида Артём Штурбабин олтин, шу вазнда беллашган Муҳриддин Тиловов кумуш, -73 кг вазнда юртимиз шарафини ҳимоя қилган Ҳикматуллоҳ Тўраев олтин, -52 кг вазнда татамига чиққан вакиламиз, ёшлар ўртасида жаҳон, катталар орасида Осиё чемпиони Диёра Келдиёрова бронза медалини қўлга киритган эди. 

Шу тариқа, Бутунжаҳон армия ўйинларининг дзюдо мусобақаси иккинчи кунги баҳсларидан сўнг терма жамоамиз 2 та олтин, 2 та кумуш ва 2 та бронза медалига эга бўлди. Ҳозирча айнан дзюдочиларимиз Ўзбекистон спорт делегациясига жами 6 та медални тақдим этишди. Дзюдо мусобақасида умумжамоа ҳисобида Хитой ва Россиядан сўнг учинчи ўринни эгаллаб турибмиз. Мезбонлар таркибида 4, Россияда 3 та олтин медаль бор.