Бутунжаҳон шахмат Олимпиадаси. Бугун ҳар икки терма жамоамиз Қора қитъа вакилларига қарши дона суради

Дунёнинг икки юзга яқин давлати терма жамоалари қатнашаётган нуфузли мусобақада бугун 2-тур учрашувлари ўтказилади. Амалдаги Олимпиада чемпиони ҳисобланган  Ўзбекистон эркаклар терма жамоаси бугун мисрлик шахматчиларга қарши баҳс олиб боради. 

Эҳромлар юрти жамоаси ҳам биз сингари 1-турда 3,5:0,5 ҳисобидаги ғалабани тантана қилди. Ўзбекистон Тринидад ва Тобагони, Миср эса Гана терма жамоасини худди шу ҳисобда таслим этган. 

Жами 184 та терма жамоа қатнашаётган аёллар ўртасидаги мусобақада Алексей Дреев мураббийлигидаги Ўзбекистон терма жамоаси муваффақиятли старт олди. Қизларимиз илк турда Гаити давлати шахматчиларини 4:0 ҳисобида доғда қолдиришди. Бугун 2-турда улар Ангола терма жамоасига қарши дона суришади. Африкаликлар 1-турда Жибути терма жамоасини 4:0 ҳисобида енгишди.