Бутунжаҳон шахмат Олимпиадаси. Эркаклар жамоамизда илк мағлубият

42-Бутунжаҳон шахмат Олимпиадасида Ўзбекистон аёллар ва эркаклар терма жамоалари ҳам иштирок этяпти. 17-жаҳон чемпиони Рустам Қосимжонов бошчилигидаги Ўзбекистон эркаклар терма жамоаси Бутунжаҳон шахмат Олимпиадасининг дастлабки икки турида Бруней ва Доминикан Республикаси терма жамоаларини 4:0 ҳисобида мағлуб этганди.

Афсуски, кеча ўтказилган учинчи тур учрашувида шахматчиларимиз Чехия терма жамоасига 1:3 ҳисобида имкониятни бой беришди. Рустам Қосимжонов ва Жаҳонгир Воҳидов мос равишда Давид Навара ҳамда Виктор Лазникка ютқазди. Антон Филиппов ва Марат Жумаев рақиблари билан дурангга имзо чекишди.

Ушбу мағлубиятдан сўнг терма жамоамиз қўшимча кўрсаткичларга кўра 62-ўринга тушиб кетди. Бугун терма жамоамиз шахматчилари Аргентина вакилларига қарши баҳс олиб боришади.