Бутунжаҳон шахмат Олимпиадаси. Кечаги ғалаба сабаб аёллар ўртасидаги баҳсларда кўтарилдик + ЖАДВАЛ

Ўзбекистон аёллар терма жамоаси кеча 7-турда Грецияни 2,5:1,5 ҳисобида мағлубиятга учратди. Қизларимиз 45-Бутунжаҳон шахмат Олимпиадасининг 1-турида Гаитини 4:0, 2-турда Анголани 3:1, 3-турда Венгрияни 2,5:1,5, 4-турда Болгарияни 2,5:1,5 ҳисобида енгишди. Бешинчи турда амалдаги Олимпиада вице-чемпиони Грузияга 1,5:2,5 ҳисобида имконият бой берилди. Қизларимиз 6-турда Нидерландия билан 2:2 ҳисобида дуранг ўйнашди. Кеча эса грециялик шахматчилар таслим этилди. 

Бугун Ўзбекистон аёллар терма жамоаси 8-турда АҚШ шахматчиларига қарши дона суради. Америкаликлар сафида ўзбекистонлик аёл гроссмейстер Гулруҳбегим Тоҳиржонова ўйнаяпти. Лекин бугун Ўзбекистон билан баҳсда у иштирок этмайди.

Америкаликлар ҳам худди биз сингари 5 ғалаба, 1 дуранг ва 1 мағлубият билан 11 очкога эга бўлиб турибди. Қўшимча кўрсаткичларга кўрагина АҚШ турнир жадвалида 5, Ўзбекистон эса 11-ўринни банд этган. Жами 10 давлат терма жамоалари ҳисобида 11 очкодан бор. Бу эса баҳсларнинг муросасиз кечаётганидан дарак.

Аёллар ўртасидаги мусобақада ҳам худди эркакларда бўлгани сингари битта терма жамоа 100 фоизлик натижа қайд этиб турибди. Ҳиндистон 7 та учрашувнинг барчасида ғалаба қозонган. Ҳиндлар 7-турда Грузияни 3:1 ҳисобида енгишди. Венгрия худди шу ҳисобда Австриядан устун келди. Украина - Польша учрашувида 2:2 ҳисоби қайд этилди. 

Қўшни Қозоғистон шахматчилари озарбайжонлик дугоналарини 3:1 ҳисобида мағлуб этиб, 12 очко билан 3-ўринни эгаллаб туришибди. Иккинчи поғонадаги Польша ҳисобида ҳам 12 очко бор. АҚШ терма жамоаси 7-турда Арманистон билан 2:2 ҳисобида дуранг ўйнади. 

8-турнинг марказий учрашувлари:

Польша - Ҳиндистон 

Венгрия - Украина 

Қозоғистон - Франция

Грузия - Болгария

ЎЗБЕКИСТОН - АҚШ

Нидерландия - Германия

Арманистон - Мўғулистон

Словения - Хитой

Озарбайжон - Италия

Испания - Словакия