Бутунжаҳон шахмат Олимпиадаси. Қизларимиз бугун Сербияга қарши дона суришади

Хабар берганимиздек, бугун йигитларимиз пешқадам Ҳиндистонга қарши муҳим учрашувни ўтказишади. Қизларимиз эса 9-турда Сербия терма жамоаси билан ҳисоб-китоб қилишади. Бугунги учрашувлар ҳам соат 18:15 да бошланади.

Якуний жуфтликлар бироздан сўнг аниқ бўлади. Ҳозирча терма жамоаларнинг 5 нафардан аъзоси тақдим этилган. Катта эҳтимол билан амалдаги Олимпиада чемпиони бўлиб турган Ўзбекистон терма жамоасининг ҳиндистонлик гроссмейстерларга қарши учрашувида дастлабки тўртлик ҳаракат қилади. 

Аёллар ўртасидаги мусобақада ҳам Ҳиндистон терма жамоаси пешқадамлик қиляпти. Улар 7 ғалаба ва 1 мағлубият қай этишган. Олти ғалаба ва икки дурангга эга Польша терма жамоаси иккинчи ўринни банд этган бўлса, кучли учликка 7 ғалаба ва 1 мағлубиятга эга Қозоғистон якун ясаган. Бу уч терма жамоа 14 очкодан жамғарган. 

Ўзбекистон аёллар терма жамоаси эса кечаги мағлубиятдан кейин 25-ўринга тушиб кетди. Қизларимиз 5 ғалаба, 1 дуранг, 2 мағлубият эвазига 11 очко тўплашган. Бугунги рақибаларимиз ҳисобида ҳам 11 очко бор. Сербия биз сингари 5 ғалаба, 1 дуранг ва 2 мағлубият билан 22-поғонадан жой олган.