Бутунжаҳон шахмат Олимпиадаси. Қизларимиз дуранг ўйнашди

42-Бутунжаҳон шахмат Олимпиадасида Ўзбекистон аёллар ва эркаклар терма жамоалари ҳам иштирок этяпти. Кеча ўтказилган 4-тур учрашувида аёллар терма жамоамиз дуранг натижа қайд этди. Австрия терма жамоаси шахматчиларига қарши дона сурган қизларимиз 2:2 ҳисобидаги муросага келишди.

Нафиса Мўминова Регина Покорнани мағлубиятга учратди. Гулруҳбегим Тоҳиржонова ва Сарвиноз Қурбонбоева рақибалари билан дуранг ўйнашди. Нодира Нодиржонова эса мағлубият аламини тотиб кўрди.

Ушбу дурангдан сўнг терма жамоамиз қўшимча кўрсаткичларга кўра 35-ўринни эгаллаб турибди. Бугун шахматчи қизларимиз Озарбайжон-3 жамоасига қарши дона суришади.

Эслатиб ўтамиз, Ўзбекистон аёллар терма жамоаси биринчи турда Парагвай терма жамоаси устидан 4:0 ҳисобида ғалаба қозонганди. Иккинчи турда эса Бельгия терма жамоаси шахматчилари 3:1 ҳисобида мағлуб этилган эди. Учинчи турда мусобақанинг биринчи тартиб рақамли жамоаси Россияга 1:3 ҳисобида имконият бой берилганди.