Бутунжаҳон шахмат Олимпиадаси. Қизларимиз ҳам ютқазишди

42-Бутунжаҳон шахмат Олимпиадасида Ўзбекистон аёллар ва эркаклар терма жамоалари ҳам иштирок этяпти. Кеча ўтказилган 3-тур учрашувида эркаклар сингари аёлар жамоамиз ҳам мағлубият аламини тотиб кўрди.

Россия терма жамоаси шахматчиларига қарши дона сурган қизларимиз кучли рақибга 1:3 ҳисобида имкониятни бой беришди. Опа-сингиллар Нафиса Мўминова ва Гулруҳбегим Тохиржонова мос равишда Александра Костеньюк ҳамда Валентина Гунинага ютқазишди. Ирина Геворкян ва Сарвиноз Қурбонбоева рақибалари билан муросага келишди.

Ушбу мағлубиятдан сўнг терма жамоамиз қўшимча кўрсаткичларга кўра 36-ўринга пастлади. Бугун шахматчи қизларимиз Австрия терма жамоасига қарши дона суришади.

Эслатиб ўтамиз, Ўзбекистон аёллар терма жамоаси биринчи турда Парагвай терма жамоаси устидан 4:0 ҳисобида ғалаба қозонганди. Иккинчи турда эса Бельгия терма жамоаси шахматчилари 3:1 ҳисобида мағлуб этилган эди.