Бутунжаҳон шахмат Олимпиадаси. Рақиблар жиддийлашмоқда, бугун ҳар икки жамоамиз европаликлар билан ўйнайди

Дунёнинг икки юзга яқин давлати терма жамоалари қатнашаётган нуфузли мусобақада бугун 3-тур учрашувлари ўтказилади. Амалдаги Олимпиада чемпиони ҳисобланган  Ўзбекистон эркаклар терма жамоаси бугун хорватиялик шахматчиларга қарши баҳс олиб боради. Хорватия 1-турда Малави терма жамоасини 4:0, 2-турда Қирғиз Республикасини 3:1 ҳисобида мағлуб этган. 

Жами 184 та терма жамоа қатнашаётган аёллар ўртасидаги мусобақада Алексей Дреев мураббийлигидаги Ўзбекистон терма жамоаси ҳам муваффақиятли одимламоқда. Қизларимиз илк турда Гаити давлати шахматчиларини 4:0, 2-турда Анголани 3:1 ҳисобида доғда қолдиришди. Бугун 3-турда қизларимиз Венгрия терма жамоасига қарши дона суришади. Мезбонлар 1-турда Пуэрто-Рикони 4:0, 2-турда эса Эквадор терма жамоасини 3,5:0,5 ҳисобида енгишди.