Бутунжаҳон шахмат Олимпиадаси. Вьетнам ва Болгарияга қарши "жанг" учун жуфтликлар маълум

Дунёнинг икки юзга яқин давлати терма жамоалари қатнашаётган нуфузли мусобақада бугун 4-тур учрашувлари ўтказилади. Амалдаги Олимпиада чемпиони ҳисобланган  Ўзбекистон эркаклар терма жамоаси бугун анча жиддий рақиб - вьетнамлик шахматчиларга қарши баҳс олиб боради. Бугунги рақибларимиз ҳам биз сингари дастлабки учта турда ғалаба нашидасини сурган. Вьетнам 1-турда Лихтенштейн терма жамоасини 4:0, 2-турда Бангладешни 3,5:0,5, 3-турда эса Қозоғистонни 3:1 ҳисобида мағлуб этган. 

Жами 184 та терма жамоа қатнашаётган аёллар ўртасидаги мусобақада Алексей Дреев мураббийлигидаги Ўзбекистон терма жамоаси ҳам муваффақиятли одимламоқда. Қизларимиз илк турда Гаити давлати шахматчиларини 4:0, 2-турда Анголани 3:1, 3-турда эса анча кучли ҳисобланган мезбон Венгрия терма жамоасини 2,5:1,5 ҳисоида енгишди. Бугун 4-турдаги рақиб - Болгария! Болгарияликлар 1-турда Зимбабвени 4:0, 2-турда Мисрни 3,5:0,5, 3-турда эса Словакия терма жамоасини 3:1 ҳисобида енгишди.