Бутунжаҳон шахмат Олимпиадаси якунланди, медаллар ўз эгаларига топширилди + ФОТО

Дунёнинг 189 давлати қатнашган мусобақада 11 учрашувдан 10 ғалаба ва 1 та дуранг қайд этган Ҳиндистон терма жамоаси Шахмат Олимпиадаси чемпионлигини қўлга киритди. Ҳиндистонлик гроссмейстерларни фақатгина бундан аввалги Олимпиада чемпиони бўлган Ўзбекистон терма жамоаси тўхтатиб қолди. Бу икки терма жамоа ўртасидаги баҳсда 2:2 ҳисобидаги жанговар дуранг натижа қайд этилганди. 

Олимпиаданинг кумуш медаллари АҚШ, бронза медаллари эса Ўзбекистон терма жамоасига насиб этди. Индивидуал йўналишларда Шамсиддин Воҳидов ўз тахтасида олтин медалга эга чиқди. Нодирбек Абдусатторов ва Нодира Нодиржонова эса кумуш медаль қўлга киритди. 

Аёллар ўртасидаги мусобақада ҳам Ҳиндистон терма жамоаси чемпионлик шоҳсупасига кўтарилди. Ҳиндлар Бутунжаҳон шахмат Олимпиадасида олтин дубл қайд этишди. Қозоғистон терма жамоаси кумуш, таркибида Гулруҳбегим Тоҳиржонова бўлган АҚШ шахматчи қизлари бронза медали билан тақдирланишди. Мусобақанинг тантанали ёпилиш маросимида медаль ҳамда кубоклар ўз эгаларига топширилди.