Бухорода ўқ отиш бўйича мусобақа якунланди

Дастлаб Ўзбекистон ўқ отиш спорти федерацияси очиқ кубоги ғолиблиги учун қатнашчилар мерганлик салоҳиятини намойиш этишган бўлса, 29 февралдан 4 мартга қадар Республика техник ва амалий спорт турлари маркази томонидан 18 ёшгача бўлган спортчилар ўртасида Ўзбекистон кубогининг биринчи босқичи ташкил этилди. Ҳар икки мусобақа ҳам муросасиз курашларга бойлиги, ғолиблик учун  кескин рақобат бўлгани билан бир биридан қолишмади.

“ Бугунги кунда олимпия ўйинлари дастуридан жой олган ўқ отиш спортини янада ривожлантириш, қолаверса, муносиб Ватан ҳимоячиларини вояга етказиш, ёшлар орасидан Ўзбекистон мудофааси учун кўксини қалқон қиладиган, шу она Ватан менинг юртим, оилам деб ёниб яшайдиган ёшларни, халқаро мусобақаларда нуфузли турнирларда Ўзбекистон шаънини муносиб ҳимоя қиладиган мард, жасур ўғлонларни, спортчиларни тайёрлаш мақсадида барча вилоятларда замонавий ўқ отиш тирлари  қурилиб, ёшлар ихтиёрига берилмоқда. Яна бир жиҳати қувонарлики, Ўзбекистон ўқ отиш спорти федерацияси ҳамда Ўзбекистон мудофаасига кўмаклашувчи “Ватанпарвар” ташкилоти Республика техник ва амалий спорт турлари маркази ҳамкорлиги натижасида, қолаверса, Ўзбекистон миллий олимпия қумитасининг қўллаб қувватлови яқин келажакда халқаро даражадаги нуфузли мусобақаларда  спортчиларимиз томонидан қўлга киритиладиган натижалар салмоғини оширади”, - дейди Республика техник ва амалий спорт турлари маркази бош директори Ш.Мўминжонов.

Ўқ отиш спорти бўйича Ўзбекистон кубогининг пневматик милтиқдан ўқ отиш баҳслари (ВП-6 машқи)да Ойбек Асилов, Зайнаб Пардабоева (иккаласи ҳам Тошкент вил.) пневматив туппончада ўқ отиш (ПП-6 машқи) мусобақаларида Жаҳонгир Ахмаджонов (Фарғона вил.) Ирода Азимбоева (Тошкент вил.)лар энг яхши натижага эришишди. Айни йўналишларда Наманган, Сурхондарё, Қашқадарё, Самарқанд вилояти вакиллари кучли учликка киришди.

Ўзбекистон кубогининг биринчи босқичида умумжамоа ҳисобида пойтахт вилояти вакиллари 2260 очко билан биринчи, Андижон вилояти спортчилари 2253 очко билан иккинчи, Наманган вилояти спортчилари 2238 очко билан учин ўринни қўлга киритишди. Кучли бешликка Хоразм ҳамда Фарғона вилояти мерганлари киришди.  

Эслатиб ўтамиз, ўқ отиш спорти бўйича Ўзбекистон кубогининг иккинчи босқичи 18-22 апрель кунлари Андижон шаҳрида, учинчи босқичи 6-10 июнь кунлари Навоий шаҳрида, якунловчи тўртинчи босқич (финал) 15-19 август кунлари Наманган шаҳрида бўлиб ўтади.