Cамарқанда “Адолат кубоги”нинг вилоят босқичи ўтказилди

Миллий спорт турларимиздан бўлган белбоғли курашга кейингги йилларда яна ҳам эътибор кучайган. Ўзбекистон “Адолат” социал демократик партияси билан белбоғли кураш федерацияси ўртасида белбоғли курашни ривожлантириш тўғрисидаги имзоланган мемаронудум ҳам бунга яққол мисол. 

Аввал хабар берганимиздек, мазкур келишув доирасида айни пайтда “Адолат кубоги” номи остида мусобақаларга старт берилган бўлиб, ҳозирда ушбу мусобақанинг туман ва вилоят босқичларида ғолиблар аниқланмоқда. 

Хусусан, Самарқанд вилояти Тойлоқ ихтисослаштирилган олимпия захиралари мактаб-интернатида ҳам “Адолат кубоги”нинг вилоят босқичи ўтказилди. Ўзбекистон “Адолат” СДП вилоят Кенгаши, Вилоят белбоғли кураш федерация ҳамда Тойлоқ ихтисослаштирилган олимпия захиралари мактаб-интернати билан ҳамкорликда ташкил этилган ушбу вилоят босқичида дастурга мувофиқ 2000-2001 ва 2002 йилларда туғилган спортчилар олтита вазн тоифасида куч синашишди. 

Якуний натижаларга кўра Шаҳзод Эргашев (55 кг.), Улуғбек Толибов (65 кг.), Аббос Тожиев (77 кг.), Шаҳзод Давронов (60 кг.), Арслон Раҳимов (71 кг.), Музроб Элмирзаев (83 кг)лар барча рақибларини енгиб, биринчи ўринни қўлга киритишди ва республика босқичига йўлланма олишди.  

Мусобақа якунида тақдирлаш маросими ташкил этилди. Ғолиб ва совриндор полвонларга диплом, кубок ва эсдалик совғаларини Ўзбекистон “Адолат” СДП сиёсий Кенгаши раисининг биринчи ўринбосари Акмал Раҳмонов ҳамда Самарқанд вилоят белбоғли кураш федерацияси ижрочи директори Баҳодир Бердиқуловлар тантанали тарзда топширишди.

Баҳодир БЕРДИҚУЛОВ, Самарқанд вилоят белбоғли кураш федерацияси ижрочи директори: 

- Ўзбекистон “Адолат” СДП билан ҳамкорликда ташкил этилган ушбу беллашувлар ҳам, миллий спорт туримиз бўлган белбоғли курашни ёшлар орасида кенг оммалашишида хизмат қилади. Айтиш жоиз, вилоятимизда кийинги йилларда белбоғли кураш билан шуғулланувчи ёшлар сони кўпайиб, мамлакат ва халқаро миқёсда ўтказилаётган турли даражадаги мусобақаларда полвонларимиз муносиб натижалар кўрсатишмоқда. Белбоғли кураш бўйича истеъдодларни топиб, тарбиялаб, терма жамоалар сафига етказиб беришда мураббийларнинг ҳам алоҳида ўрни бор. Тойлоқ ИОЗМИ мураббийлари Ғанишер Бердиқулов, Фахриёр Раҳмонов Қодир Эрназаров, Ойбек Дўстмуродов, Ҳусниддин Маманов, Нуробод туманидан Зоҳид Ўролов, Пасдарғом туманидан Мафтунбек Ҳошимов, Жомбой туманидан Баҳодир Каримов каби тажрибали мураббийларнинг меҳнатлари таҳсингга лойиқ. 

Илҳом РАҲМОНОВ тайёрлади