Candidates Tournament 2024. 17 ёшли Гукеш даъвогарлар турнири ғолиби!

Эркаклар ва аёллар ўртасидаги ушбу мусобақада 8 нафардан шахмат юлдузлари жаҳон тожига даъвогар номини аниқлаб бериш учун ўзаро дона суришди. 

Мукофот жамғармаси 500 000 еврони ташкил қилган мусобақанинг эркаклар ўртасидаги баҳсларида америкаликлар Ҳикару Накамура, Фабиано Каруана, ҳинд гроссмейстерлари Сантош Гужрати, Гукеш Доммараджу, Рамешбабу Праггнанадҳа, озарбайжонлик Нижат Абасов, франциялик Алиреза Фирузжа ҳамда FIDE байроғи остида қатнашган Ян Непомняший ўз маҳоратини намойиш этди.

Кеча ўтказилган сўнгги 14-турнинг 3 та партиясида томонлар муросага келишди. Битта партияда ғолиб аниқланди. Пешқадам Гукеш Доммараджу сўнгги турда ўзига керакли дуранг натижага эришиб, якунда 9 очко билан даъвогарлар турнири ғолибига айланди. 

Бунга Гукешнинг асосий таъқибчилари Фабиано Каруана (АҚШ, 2803) ва Ян Непомнящий (FIDE, 2758)нинг ўзаро дуранг ўйнагани ҳам ёрдам бериб юборди. Энди 17 ёшли Гукеш кузда амалдаги жаҳон чемпиони, хитойлик гроссмейстер Дин Лижэнга қарши жаҳон тожи учун дона суради. 

Candidates Tournament 2024. 14-тур натижалари

Хикару Накамура (АҚШ, 2789) — Гукеш Доммараджу (Ҳиндистон, 2743) — 0,5:0,5

Фабиано Каруана (АҚШ, 2803) — Ян Непомнящий (FIDE, 2758) — 0,5:0,5

Нижат Абасов (Озарбайжон, 2632) — Рамешбабу Прагнанандха (Ҳиндистон, 2747) — 0:1

Алиреза Фируджа (Франция, 2760) — Видит Гуджрати (Ҳиндистон, 2727) — 0,5:0,5   

Турнир жадвалидаги якуний ҳолат:

1. Гукеш – 9 очко

2-4. Накамура, Непомняший, Каруана – 8,5 

5. Прагнанандҳа – 7

6. Видит – 6

7. Фируджа – 5

8. Абасов – 3,5.

Маълумот учун, ушбу даъвогарлар турнирида ҳамюртимиз Нодирбек Абдусатторов иштирок этмади. Боиси, мусобақанинг барча саккиз иштирокчиси турли саралаш турнирлари орқали йўлланмани қўлга киритганди.