Champions Chess Tour. Нодирбек Абдусатторов 1/2 финалнинг илк сетида Уэсли Сони мағлуб этди

Умумий мукофот жамғармаси 500 000 АҚШ долларини ташкил этувчи ушбу мусобақанинг финал босқичида дунёнинг саккиз нафар кучли гроссмейстери қаторида ҳамюртимиз Нодирбек Абдусатторов (2727) ҳам иштирок этяпти. 

Кеча ярим финал босқичининг жуфтликлардаги биринчи сет баҳслари ўтказилди ва қувонарлиси, Нодирбек америкалик номдор рақиби Уэсли Сони 2,5:1,5 ҳисобида мағлубиятга учратди. Биринчи сетнинг илк партиясида Со ғолиб чиққан бўлса, кейин Абдусатторов кетма-кет икки партияни ўз фойдасига ҳал қилди. Тўртинчи партияда томонлар дурангга имзо чекишди. Айнан Со гуруҳ босқичини биринчи ўринда якунлаган эди.  

Иккинчи ярим финал жуфтлигида эса амалдаги жаҳон чемпиони Магнус Карлсен америкалик Фабиано Каруана 3:2 ҳисобида доғда қолдирди. Бугун 1/2 финалда иккинчи сет партиялари ўйналади. Агар Нодирбек Абдусатторов бугун ҳам ғалаба қозона олса, финал чиптасини қўлга киритади. Агар учрашув дуранг натижа билан якунланса, бугуннинг ўзида ҳал қилувчи учинчи сет ўйналади.