Champions Chess Tour. Нодирбек Абдусатторов 3-ўрин ва 50 минг долларга эга чиқди

Умумий мукофот жамғармаси 500 000 АҚШ долларини ташкил этувчи ушбу мусобақанинг финал босқичида дунёнинг саккиз нафар кучли гроссмейстери қаторида ҳамюртимиз Нодирбек Абдусатторов (2727) ҳам иштирок этаётган эди. 

Кеча ярим финал босқичининг жуфтликлардаги иккинчи сет баҳслари ўтказилди ва финалга йўл олган гроссмейстерлар номи маълум бўлди. Кутилганидек, биринчи жуфтликда амалдаги жаҳон чемпиони Магнус Карлсен америкалик Фабиано Каруанани 3:2 ҳисобида мағлубиятга учратди. 

Иккинчи ярим финалда эса Нодирбек биринчи сетдаги устунлигини сақлаб қола билмади. Америкалик номдор рақиб Уэсли Со иккинчи сетда 2,5:1,5 ҳисобида зафар қучиб, умумий ҳисобги тенглаштирди. Ғолиб номини аниқлаб берган учинчи сетнинг икки партиясида дуранг натижа қайд этилди. Финалчини аниқлаган Армагеддон партиясида эса Нодирбек яхши позицияга эга бўлса-да, биргина йўл қўйган хатоси туфайли мағлубиятга учради.

Шу тариқа, Нодирбек Абдусатторов нуфузли Champions Chess Tour мусобақасини учинчи ўринда якунлади. Шунингдек, ёш гроссмейстеримиз 50 минг АҚШ доллари миқдоридаги мукофот пулини ҳам қўлга киритди. Энди бош соврин учун Магнус Карлсен ва Уэсли Со баҳс олиб боришади. Абдусатторов эса шу ой Самарқандда ўтказиладиган рапид ва блиц йўналишидаги жаҳон чемпионатига тайёргарлик кўради.