Champions Chess Tour. Нодирбек Абдусатторов Канададаги супертурнирнинг 1/2 финалида ўйнайди

Умумий мукофот жамғармаси 500 000 АҚШ долларини ташкил этувчи ушбу мусобақанинг финал босқичида дунёнинг саккиз нафар кучли гроссмейстери қаторида ҳамюртимиз Нодирбек Абдусатторов (2727) ҳам иштирок этмоқда. 

Кеча ўтказилган сўнгги еттинчи турда Нодирбек франциялик Максим Вашье-Лаграв (2771)ни 2:1 ҳисобида мағлубиятга учратди. Дастлабки икки партияда дуранг натижа қайд этилди. Ҳал қилувчи учинчи партияда қора доналарда ҳаракат қилган Абдусатторов рейтингда ўзидан юқорида турган рақибини мағлубиятга учратди ва гуруҳ босқичини 4-ўринда якунлади. 

Сўнгги турда амалдаги жаҳон чемпиони Магнус Карлсен франциялик Алиреза Фирузжадан 2:1 ҳисобида устун келди. Америкалик Уэсли Со ягона мағлубиятини айнан 7-турда ватандоши Фабиано Каруанадан қабул қилиб олди. Гарчи 1:2 ҳисобида ютқазган бўлса-да, Со Магнус Карлсен билан бирга тўғридан-тўғри 1/2 финал йўлланмасини қўлга киритди. Карлсен ҳам ягона мағлубиятини айнан Уэслидан қабул қилиб олганди. 

Мусобақа регламентига кўра 3-6 ўринни эгаллаган жамоалар ўзаро ярим финалнинг икки чиптаси учун баҳс олиб боришди. Гуруҳда тўртинчи ўринни банд этган Абдусатторов Сурвивал босқичида дастлаб Фабиано Каруанага қарши баҳс олиб борди. Биринчи партияда Фабиано, иккинчисида Нодирбек зафар қучди. Ғолиб номини аниқлаб берган армагедон партиясида Каруананинг қўли баланд келди. Иккинчи жуфтликда Ҳикару Накамура Максим Вашье-Лагравдан армагедон партиясида устун келди. Ярим финалнинг сўнгги иштирокчисини аниқлаб берган мағлублар учрашувида эса Абдусатторов Накамурани енгди. Икки партияда дуранг қайд этилди, армагедонда эса Нодирбек чиройли ғалабага эришиб, 1/2 финалнинг сўнгги иштирокчисига айланди. 

Демак, 1/2 финалда Магнус Карлсен Фабиано Каруанага, Нодирбек Абдусатторов Уэсли Сога қарши дона суради.