Чарльз Жонсон Рамазон Темировнинг нокаут бўлишини исташини айтди

Жонсон, шунингдек, жанг спортларида стероидлардан фойдаланган спортчиларга нисбатан камида икки йиллик четлатиш жазоси қўлланиши керак, деган фикрни билдирди.

«Стероид билан қўлга тушган бу фирибгарга ватандошларидан бошқа ҳеч ким эътибор бермайди», — деди Жонсон.

У Темировнинг Каванага қарши бўлажак жанги ҳақида ҳам кескин гапирди.

«Умид қиламанки, у қафасга чиқаётганида тошга қоқилиб тушади ва Кавана уни нокаут қилиб, ухлатиб қўяди», — деди у.

Жонсоннинг фикрича, аралаш якка кураш спортларида устунликка эришиш мақсадида тақиқланган моддалардан қасддан фойдаланган спортчиларга камида икки йиллик тақиқ қўйилиши керак.

«У ўша кечада ўлиб бўлганди, уни гонг ва таймер қутқариб қолди. Ҳатто кардиони яхшилайдиган стероид таъсирида бўла туриб ҳам раундлар оралиғида тик тура олмади», — дейди Жонсон.

Рамазон Темиров Чарльз Жонсонни 2024 йилда нокаутга учратган эди. Ҳамюртимиз эртага англиялик Ловен Кавана билан жанг қилади.