Чавандозларимиз ЕвроОсиё лигасида муносиб иштирок этишди

Мусобақанинг биринчи кунида ҳамюртларимиз совриндорлар қаторидан жой олишди. 120-130 см баландликдаги тўсиқлардан сакраш баҳсларида ҳамюртимиз Бекзод Қурбонов “Дерливанг” лақабли отида олтин медални қўлга киритди. 2 фазали 110 см баландликдаги тўсиқлардан сакраш баҳсларида Дилшод Шокиров ҳам 1-ўринни эгаллади.

125 см баландликдаги тўсиқлардан сакраш баҳсларида Баҳромжон Газиев “Леди” лақабли отида 2-ўринни, 2 фазали 100 см баландликдаги тўсиқлардан сакраш бўйича Бекзод Қурбонов “Донна Глориана” лақабли отида 3-ўринса сазовор бўлди.

Конкур бўйича ёшлар ва катталар ўртасида ЕвроОсиё лигаси баҳсларининг иккинчи куни ҳам чавандозларимизнинг совринли ўринларни қўлга киритиши билан якунланди.

Баландлиги 115 см бўлган (икки даврада) тўсиқлардан сакрашда Бобуржон Валижонов “Самира” лақабли отида яккалик баҳсларида кумуш медални қўлга киритди. Шунингдек, Дилшод Шокиров ва Бобуржон Валижоновлар тўсиқлар баландлиги 115 см бўлган маршрутда жамоавий баҳсларда 2-ўринни эгаллашди.

Баландлиги 115 см бўлган тўсиқлардан сакраш баҳсларида ҳам ҳамюртларимиз ғолиб бўлишди: Аъзам Толиббоев биринчи бўлди, кумуш медал эса “Бранд” лақабли от билан қатнашган Умиджон Комиловга насиб этди.

Тўсиқлар баландлиги 135-140 см бўлган баҳсларда 6 та давлат ўртасида умумжамоа ҳисобида Ўзбекистон термаси кумуш медални қўлга киритди. Ушбу йўналишда Ўзбекистон терма жамоаси шарафини Бекзод Қурбонов, Умиджон Комилов, Нуржон Туякбоев ва Аъзам Тўлиббоевлар ҳимоя қилишди.