Чавандозларимиз Қатар турнирида муваффақиятли иштирок этишди

Аҳамиятилси, Ўзбекистон йилқичилик ва от спорти федерацияси раиси вазифасини бажарувчи Баҳромжон Газиев бошчилигида спортчиларимиз ҳам ушбу мусобақада қатнашишди.

Таъкидлаб ўтиш жоизки, “Longines” туркумидаги мусобақалар дунё миқёсида катта обрўли спорт мусобақаси ҳисобланади. Унда сайёрамизнинг энг сара чавандозлари беллашишади. 26-29 февраль кунлари ўтказилган мусобақада дунёнинг 25 дан ортиқ мамлакатидан ташриф буюрган 150 нафардан зиёд спортчилари қатнашди. 

Турнир якунларига кўра “Longines Hathab – Medium Tour 2020” 120-120 см бўлган тўсиқлардан сакраш беллашувларида хамюртимиз Оқил Собиржонов энг юқори натижалардан бири билан ушбу турнирнинг кумуш медалига сазовор бўлди. “Longines Hathab – Open Class 2020” 115-125 см бўлган мусобақада Бахромжон Газиев чавандоз сифатида қатнашиб, 73 та спортчи орасида кучли ўнликка кирди. 

Мусобақанинг энг қувонарли хабарларидан бири баландлиги 130-145 см бўлган тўсиқлардан сакраш мусобақасида Абдушукур Собиржоновнинг олтин медал соҳибига айланиши бўлди. Ҳамюртимиз Оқил Собиржонов ҳам ушбу мусобақада қатнашиб кучли тўртталикдан жой олди.

Эслатиб ўтамиз, ўтган ҳафта ҳамюртларимиз Европа ареналарида ўтган мусобақада ҳам юқори ўринларни эгаллашган эди. Мазкур ойда спортчиларимизнинг яна бир қатор турнирларда юртимиз шарафини ҳимоя қилишлари режалаштирилган.