Чимаевнинг мураббийи Хабибнинг танқидига чиройли "ответ" қилди

"Ҳурматли Хабиб, мусулмон биродарим! Аввало шуни айтмоқчиманки, сизни спортчи сифатида ва севимли спортимиздаги барча ютуқларингиз учун жуда ҳурмат қиламан. Барча интервью ва чиқишларда динимизни, эътиқодимизни, Аллоҳни эслашингиздан жуда фахрланаман. Лекин Хамзатнинг атрофида мусулмонлардан иборат жамоа йўқлиги ва гўё шу сабаб унинг вазн қила олмаганига изоҳ бермоқчиман.

Бу ерда сизнинг фикрингизга қўшилмайман. Биринчи кундан бошлаб Хамзатнинг олдида нафақат мен каби мусулмон дўстлари, жамоадошлари, балки бошқа дин ва жамият вакиллари ҳам бор эди. Улар бошиданоқ у билан бирга бўлган, унга меҳр кўрсатган, қайғу ва қувончини бирга баҳам кўрган. Улар Хамзатни ҳозирги даражага етиши учун кўп нарса қилган.

Мусулмон бўлиш мукаммал ва бенуқсон бўлиш дегани эмас. Менга ишонинг, ҳаётимда кўп хато қилдим, сиз ҳам. Шунинг учун мусулмонлардан иборат жамоа бўлиш сизни комил инсон қилади деган фикрга қўшилмайман. Қайси эътиқод ёки дин бўлишидан қатъий назар, яхши ва оғир дамларда сизга ғамхўрлик қиладиган жамоага эга бўлиш муҳимроқ. Бундай жамоа Хамзатда бор.

Хамзат вазн қила олмаганига бир қанча сабаблар бор ва улар жамоанинг ичида қолади. У ҳали ёш ва хатоларидан сабоқ олади. Агар сиздек катта номга эга чемпион шу каби хатолардан сабоқ олган бўлса, Хамзат ҳам бунга бардош беришига шубҳам йўқ", — деб ёзади Мадади ижтимоий тармоқларда.

Эслатиб ўтамиз, енгил вазнда собиқ UFC чемпиони Хабиб Нурмагомедов Хамзат Чимаевнинг расмий тарози маросимидаги чиқишини танқид остига олганди.

Швециялик аралаш яккакураш устаси UFC 279 турнирининг расмий тарозидан ўтиш маросимида белгиланган вазн меъёрини бажара олмагани етмагандек, саҳнадан туриб мухлисларга турли номақбул ҳаракатларни қилган эди. 

"Агар сен мусулмон бўлсанг, атрофингга иймон ва диёнатли кишиларни жамлашинг керак. Зеро, айнан улар сени нима мумкин ва нима мумкин эмаслигини айтиб, тўғри йўлга бошлайди. Мен Хамзат Чимаевнинг расмий тарози маросимидаги чиқишини кўрдим. Афсуски, унинг жамоасида мусулмон кишиси йўқ. Бу эса жуда ёмон ва хунук ҳолат. Яратганни таниган инсон йўқлигидан шундай кўнгилсиз ҳолатлар юзага келади", - деганди Нурмагомедов.