Чирчиқда фестивал ўтказилди ФОТОГАЛЕРЕЯ

Ёшлар ўртасида ҳарбий ватанпарварлик тарғиботи, спортнинг техник ва амалий турларини ривожлантириш орқали соғлом турмуш тарзини тарғиб қилиш ҳамда “Ватанпарвар” ташкилотининг асосий фаолият турларидан бўлган автомототранспорт ҳайдовчилари тайёрлаш борасидаги ишларни тарғиб этиш, мамлакатимизда спортнинг оммавийлигини ошириш каби эзгу-мақадларни кўзлаган мазкур фестивал дастлаб, Чирчиқ шаҳри кўчалари бўйлаб Ўзбекистон мудофаасига кўмаклашувчи “Ватанпарвар” ташкилоти Тошкент вилояти кенгаши тасарруфидаги ташкилотларнинг ўқув автомобиллари карвонининг ҳаракатланиши билан бошланди. 

Шундан сўнг, беш километр масофага югуриш марофони ташкил этилди. Марафонда умумий ўрта таълим мактаби, касб-ҳунар коллежлари ўқувчилари, Чирчиқ давлат педагогика институтининг спорт ва чақириққача ҳарбий таълим факультети, жисмоний маданият кафедараси, факултетлараро жисмоний тарбия кафедраси ўқитувчилари ва талабалари, Чирчиқ олий танк қўмондон-муҳандислик билиб юрти курсантлари ҳамда маҳаллаларда истиқомат қилаётган уюшмаган ёшлар иштирок этишди. 

Маррага биринчилардан бўлиб етиб келган иштирокчилар “Ватанпарвар” ташкилоти Тошкент вилояти кенгашининг спорт мажмуасида муносиб тақдирланди. Чирчиқ олий танк қўмондон-муҳандислик билиб юрти курсантлари томонидан ҳарбий оркестрлар садоси остида саф юришлари ва қўл жанги бўйича кўргазмали чиқишлари, кинологларнинг хизмат итлари билан амалга оширган турли усулдаги машқларни бажариши фестивалга ўзгача кўтарингкилик бағишлади. 

Шунингдек, фестивал иштирокчилари ёзги биатлон бўйича вилоят биринчилиги беллашувларига ҳам гувоҳ бўлишди. Куннинг иккинчи ярмида эса Чирчиқ шаҳридаги “Кимёгарлар” маданият саройида спортнинг картинг, мотокросс, авиа ва ракета модел каби техник ва амалий турларидан кўргазмалар, таниқли шоир ва ёзувчилар иштирокида “Сиз севган қахрамонлар” мавзусида учрашувлар бўлиб ўтди. 

Бундан ташқари, ҳарбий-ватанпарварлик тарбияси соҳасида фаолият олиб борувчи мутахассислар, умумтаълим мактабларининг ёшларни чақириққача тайёрлаш бўйича ўқитувчиларига методик ёрдам кўрсатишга мўлжалланган “Ёшларнинг ҳарбий-ватанпарварлик тарбияси” китобининг тақдимоти ўтказилди. 

Фестивал доирасида Чирчиқ давлат педагогика институти ҳамда “Ватанпарвар” ташкилоти Тошкент вилояти кенгаши ўртасида ўзаро ҳамкорлик тўғрисидаги меморандум ҳам имзоланди.       

Илҳом РАҲМОНОВ тайёрлади, ўз мухбиримиз