Чироқчида “Ҳоким Кубоги” мусобақаси ўтказилди + ФОТО

Жисмоний тарбия ва спортни кенг оммалаштириш, айниқса, ёшлар орасида, маҳалла, олис қишлоқ-овулларда истиқомат қилаётган аҳоли орасида спортни кенг тарғиб қилиш, соғлом турмуш тарзини янада шакллантириш, истеъдодли спортчи-ёшларни эрта аниқлаш  мақсадида мамлакатимизнинг барча ҳудудларида бўлгани каби Қашқадарё вилоятнинг ҳар бир туман ва шаҳарларида ҳам спорт турлари бўйича мусобақалар ташкил этилмоқда. 

Хусусан, вилоятнинг Чироқчи туманида ҳам мазкур жараёнларга алоҳида эътибор қаратилмоқда. Жумладан, Чироқчи туманидаги болалар-ўсмирлар мактабида шахмат бўйича 18 ёшдан 30 ёшгача бўлган йигит-қизлар ўртасида “Ҳоким кубоги” беллашувлари бўлиб ўтди. 

Чироқчи туман ҳокимлиги, вилоят жисмоний тарбия ва спорт бошқармаси, туман жисмоний тарбия ва спорт бўлими, туман халқ таълими бўлими ва бошқа ҳамкор ташкилотлар кўмагида ташкил этилган ушбу беллашувларда 100 нафардан ортиқ ҳаваскор шахматчилар иштирок этишди. 

Мусабақанинг якуний натижаларига кўра хотин-қизлар ўртасида Холида Номозова барча рақибларини енгиб, биринчи ўринни қўлга киритди. Эркаклар ўртасида эса Даврон Шариповга тенг келадигани топилмади ва ғолибликни тантана қилди. 

Мусобақа якунига етгач тақдирлаш маросими бўлиб ўтди. Тақдирлаш маросимида иштирок этган Чироқчи туман ҳокими Хуррам Жўраев ғолиб ва совриндорларга кубок, медаль, диплом ва қимматбаҳо эсдалик совғаларини топширди. 

Айтиж жоиз, бугун ва эртага туманда яна белгиланган дастурга мувофиқ, спортнинг улоқ-кўпкари ҳамда белбоғли кураш турлари бўйича ҳам “Ҳоким кубоги” мусобақалари ўтказилади.

Илҳом РАҲМОНОВ тайёрлади