07 май 19:13
Янгиликлар

Тадбирлар

Чироқчида Иккинчи жаҳон уруши қатнашчилари эъзозланди ФОТО

9 май - Хотира ва қадрлаш куни муносабати билан давлат ва жамоат ташкилотлари, ёшлар томонидан бугунги тинч ва осуда ҳаётимиз учун кўксини қалқон қилиб, фашизмга қарши мардонавор жанг қилган Иккинчи жаҳон уруши қатнашчилари, фронторти меҳнат фахрийлари, нуроний ота-оналарнинг ҳолидан хабар олиниб, уларга меҳр-мурувват кўрсатилмоқда.

Хусусан, Қашқадарё вилояти Чироқчи туман жисмоний тарбия ва спорт бўлими мутасаддилари, 1-сонли болалар ва ўсмирлар спорт мактаби мураббийлари, спортчи-ўқувчилар, ёш чемпионлар туманда истиқомат қилаётган Иккинчи жаҳон уруши қатнашчилари - 98 ёшли Жўра бобо Ёдгоров, 100 ёшли Эшмирза бобо Очилов, 98 ёшли Абдихолиқ Боймиров ҳамда 98 ёшли Эргаш бобо Бекназаровларнинг хонадонларига ташриф буюриб, уларга алоҳида ҳурмат-эҳтиром кўрсатишди, совға-саломлар билан дилларини хушнуд этишди.

Ўз навбатида уруш иштирокчилари ҳам кекса авлод вакилларини эъзозлаш юзасидан амалга оширилаётган ишлар, юксак эътибор ва ғамхўрликдан мамнун эканлиги ва бундай хайрли эзгу-амаллар ёшларимизни она Ватанга муҳаббат, Юртга садоқат ва миллий қадриятларимизга ҳурмат руҳида вояга етказишга хизмат қилишини алоҳида таъкидлашди.