Cув полоси. Наманганда Ўзбекистон чемпионати бошланди ФОТОГАЛЕРЕЯ

Қарийиб бир ҳафта давом этадиган мазкур мусобақада 8 та эркаклар ва 6 та аёллар жамоалари совринли ўринлар учун кураш олиб борадилар. Агарда аёллар жамоалари бир гуруҳда ўзаро куч синашсалар, эркаклар ўртасидаги мусобақалар 2 та гуруҳда олиб борилади.

Мамлакат чемпионати баҳслари аёллар ўртасидаги учрашувлар билан бошланди. Дастлаб сузиш ҳавзасига Хоразм вилояти ва Тошкент шаҳри жамоалари тушдилар. Пойтахтлик ватерполчиларнинг тўлиқ устунлигида ўтган ўйин йирик 29:1 ҳисобида Тошкент шаҳри жамоасининг ғалабаси билан якун топди.

Наманган шаҳри ва Наманган вилояти ихтисослаштирилган болалар ва ўсмирлар спорт мактаби жамоалари ўртасидаги бахсда ҳам сезиларли устунликка эга бўлган Наманган шаҳри жамоасининг 22:1 ҳисобида қўли баланд келди.

Наманган вилоят ҳамда Республика сузиш федерацияси терма жамоалари ўртасидаги бахс эса 16:0 ҳисобида мезбонларнинг фойдасига ҳал бўлди.

Аёллар ўртасидаги биринчи тур ўйинлари якунига етгач, Ўзбекистон чемпионатининг очилишига бағишланган тадбир бўлиб ўтди. Ҳақиқий байрамона руҳда ташкил этилган очилиш тантаналарида сўзга чиққанлар мамлакатимизда спортга, хусусан сув полосига Давлатимиз ва хукуматимиз томонидан қаратилаётган эътибор, яратилаётган шароитлар ҳақида атрофлича тўхталиб, барча иштирокчи жамоаларга бўлажак беллашувларда омад ва зафарлар тилашди.

Ўзбекистон чемпионатининг очилиш маросимида Халқаро ва Европа сузиш федерацияларининг сув полоси бўйича техник қўмиталари аъзоси, Россия сузиш федерациясининг биринчи вице-президенти, Олимпия ўйинлари ғолиби Евгений Шаронов фахрли меҳмон сифатида иштирок этиб, барча жамоаларни мусобақаларни бошланиши билан қутлади.

Куннинг иккинчи ярмида эркаклар жамоалари ўртасида дастлабки тур ўйинлари ўтказилди. 

Дастлаб, “А” гуруҳи вакиллари Наманган вилояти ҳамда Республика сузиш федерацияси жамоалари ўзаро куч синашдилар. Ушбу учрашувда мезбонлар рақиб дарвозасига жавобсиз 16 та гол киритишди ва гуруҳ пешқадами бўлиб олдилар. 

Ушбу гуруҳда бўлиб ўтган иккинчи учрашувда Республика олий спорт маҳорати мактаби жамоаси Фарғона шаҳри жамоани 10:0 ҳисобида мағлуб этди.

“В” гуруҳида ўтказилган учрашувлар “А” гуруҳида бўлиб ўтган ўйинларга қараганда голларга бой бўлди. Агарда дастлабки икки учрашувда дарвозаларга жами 26 та тўп киритилган бўлса, “В” гуруҳидаги бахсларда 40 та гол дарвоза тўридан жой эгаллади.

Хусусан, Тошкент шаҳри ва Наманган вилояти ихтисослаштирилган болалар ва ўсмирлар спорт мактаби жамоалари баҳси 16:7 ҳисобида мезбонлар ғалабаси билан якунланди. Наманганнинг “Ёшлик” ва Наманган шаҳри жамоалари қарама-қаршилигида эса Наманган шаҳри жамоасининг 16:1 ҳисобида қўллари баланд келди.

Биринчи тур ўйинлари якунига етгач, шу ернинг ўзида матбуот анжумани  ташкил этилди. Унда Ўзбекистон сузиш федерацияси раҳбарияти ва мамлакатимизда меҳмон бўлиб турган Евгений Шаронов журналистларнинг қизиқтирган барча саволларига атрофлича жамоа бердилар.

Шундан сўнг, россиялик меҳмон мамлакатимиз спортчи ва мураббийларига маҳорат сабоқларини ўтади. 

Шу тариқа, сув полоси бўйича Ўзбекистон чемпионатининг биринчи кунги дастурдан ўрин олган барча мусобақа ва тадбирлар якунига етди. Эслатиб ўтамиз, мамлакат чемпионати бахслари 25 сентябрга қадар давом этади.